Amsterdami ndalon anijet turistike për të kufizuar vizitorët dhe për të frenuar ndotjen

Këshilli i Amsterdamit ka ndaluar anijet e lundrimit nga qendra e qytetit.

Masa vjen teksa kryeqyteti holandez përpiqet të kufizojë numrin e vizitorëve dhe të frenojë ndotjen.

Politikbërësit kanë thënë se anijet nuk ishin në përputhje me ambiciet e qëndrueshme të qytetit.

Çka nënkupton se terminali qendror i lundrimit në lumin IJ pranë stacionit kryesor të trenit të Amsterdamit do të mbyllet.

Kjo është edhe masa e fundit për të frenuar turizmin masiv në qytet.

Anijet turistike janë kthyer në një simbol të problemit, me më shumë se 100 ankorime në kryeqytet çdo vit.

Në mars, qyteti nisi një fushatë në internet duke u kërkuar të rinjve britanikë që mendonin të organizonin festat e tyre të beqarisë në Amsterdam që të qëndronin larg.

Amsterdami është bërë viktimë e popullaritetit të tij, duke tërhequr 20 milionë vizitorë në vit.

“Anijet e lundrimit në qendër të qytetit nuk përshtaten me detyrën e Amsterdamit për të ulur numrin e turistëve”, ka thënë Ilana Rooderkerk nga partia liberale D66, e cila drejton qytetin së bashku me Partinë Laburiste dhe ambientalistët.

Kryebashkiaku Femke Halsema u ankua vitin e kaluar se turistët e lundrimit u liruan për disa orë, hanin në zinxhirë ndërkombëtarë dhe nuk kishin kohë për të vizituar një muze, duke konsumuar qytetin, por duke bërë pak për të.

Arsyeja tjetër kryesore për heqjen e anijeve turistike është ulja e niveleve të ndotjes së ajrit në Amsterdam.

Një studim i vitit 2021 i një anijeje të madhe lundrimi zbuloi se ajo kishte prodhuar të njëjtat nivele të oksideve të azotit (NOx) në një ditë si 30 mijë kamionë.

Vende të tjera ankorimi larg qendrës së qytetit janë duke u shqyrtuar prej disa kohësh, por ende nuk është marrë një vendim.

Në një zhvillim të veçantë, Amsterdami ka njoftuar planet për të rritur kulturën e natës për të rinjtë.

Qyteti ka përshkruar qëllimin e tij për të gjetur vendndodhje të klubeve të natës, si tunele dhe garazhe të pashfrytëzuara, për të zhvilluar talentin e “të rinjve krijues që duan të organizojnë diçka gjatë natës”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.