Albin Kurtit do t’i bëhej atentat nga një snajperist – Zbardhen email-et e Gledis Nanos

Kryeministrit të Kosovës, Albin Kurti, do t’i bëhej një atentat prej një shtetasi shqiptar, sipas të dhënave që kanë dalë nga publikimi i email-eve të ish-Drejtorit të Përgjithshëm të Policisë së Shtetit, Gledis Nano.

Të dhënat janë publikuar nga hacker-ët iranianë të njohur si grupimi “Homeland Justice”, të cilët kanë shpërndarë në median e tyre Telegram një dosje me mbi një gigabyte të dhëna, sa i përket korrespondencës së Nanos.

I dyshuari, siç shkruhet në mesazhin e informacionit nga Njësia Kundër Terrorizmit në Kosovë, ishte shtetasi Prek Kodra, qytetar shqiptar, me aftësi të jashtëzakonshme në qitje me snajper.

Dy persona të tjerë ishin në shënjestër të një sulmi të mundshëm po ashtu.

I pari, Xhavit Haliti, ish-deputet i Partisë Demokratike të Kosovës dhe tjetri, Ismet Hoxha, ish-pjesëtar i Shërbimeve Sekrete të Kosovës dhe i afërm i Kadri Velesit, ish-kryetar i Parlamentit të Kosovës.

Snajperisti Prek Kodra, siç përshkruhet në dokument, operonte në tre qytete: Tropojë, Ferizaj dhe Deçan.

Ky person, përshkruhet po ashtu si shtetas me rekorde të ndryshme kriminale dhe është hetuar edhe më parë nga njësi të sektorit të krimit, për vrasje me paramendim dhe armëmbajtje pa leje.

Qëllimi i këtyre vrasjeve, ka qenë destabilizimi i Kosovës, ku skenari ka qenë ai, i cili me anë të vrasjes së Kurtit, do të arrinte ta dobësonte Lëvizjen Vetëvendosje në atë pikë, sa të rikthente në pushtet PDK-në dhe AAK-në.

Vrasjet, do të ndodhnin një muaj njëra larg tjetrës në afat kohor, duke shkaktuar edhe destabilizimin e vendit.

Njëkohësisht, Policia e Kosovës, veçanërisht njësia kundër terrorizmit, ka identifikuar 17 persona, të cilët mund të kenë pasur lidhje mbi këtë ngjarje dhe kanë ndërmarrë veprime të mëtejshme në këtë çështje, por pa bërë publike detaje specifike.

Një seri dokumentesh janë bërë publike nga “Homeland Justice”, ku flitet edhe për një atentat të mundshëm ndaj ish-kreut të opozitës shqiptare, Lulzim Basha, i cili nuk qe arritur me sukses.

Albanian Post i posedon të gjithë dokumentet e publikuara dhe po vijon me verifikimin e tyre, për të pasqyruar detaje të mëtejshme nga ngjarjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.