Abdixhiku pas takimit me Osmanin: U informova mbi gjendjen në Veri, tash duhet fitore diplomatike në politikë

Zëdhënësja e Lidhjes Demokratike të Kosovës, Sibel Halimi, ka bërë të ditur për Albanian Post se ka përfunduar takimi mes kryetarit të LDK-së, Lumir Abdixhiku dhe presidentes së Kosovës, Vjosa Osmani ndërsa pas takimit, Abdixhiku përmes një postimi në platformën sociale, Facebook, ka theksuar se nga Presidentja e Drejtori i AKI-së, është informuar mbi gjendjen e sigurisë në Veri të Kosovës dhe angazhimin e institucioneve shtetërore – veçmas ato të sigurisë e inteligjencës – në përballje me sulmet terroriste gjatë ditëve të fundit, dhe jo vetëm.

“Kam shprehur mirënjohjen e LDK-së për të gjithë në shërbim. Kam shprehur po ashtu domosdoshmërinë e unitetit nacional në përballje me sfidat që mund të vijnë nga Serbia; si shtet sponsorizues e strehues i terroristëve”, ka shkruar Abdixhiku në Facebook.

Albanian Post, të mërkurën, kishte kuptuar se Osmani pas rikthimit nga Shtetet e Bashkuara të Amerikës, po zhvillon një takim me Shefin e Agjencisë Kosovare të Inteligjencës, por edhe me kryetarin  e LDK-së Abdixhikun.

Pas takimit me Abdixhikun, Osmani bashkë me Ajetin do të takohen edhe me Memli Krasniqin e Partisë Demokratike të Kosovës dhe Ramush Haradinajn e Aleancës për Ardhmërinë e Kosovës.

Ky takim mes Osmanit dhe kreu të LDK-së po ndodh tri ditë pas vrasjes së rreshterit Afrim Bunjaku në fshatin Banjskë të Zveçanit, kur një grup i armatosur që përbëhej prej rreth 30 personash sulmuan Policinë e Kosovës.

Po ashtu të martën Osmani është takuar edhe me ambasadorin e Shteteve të Bashkuara të Amerikës në Kosovë, Jeffrey Hovenier, me të cilin ka diskutuar për situatën e krijuar në Veri.

Osmani në takim me shefin e AKI-së dhe kryetarin e LDK-së

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.