Lajmin e dhënë në disa media pro-pushtetit në Serbi, se kryeministri i Kosovës, Albin Kurti, ka zhvilluar takim të fshehtë me ambasadorët e vendeve të QUINT-it në Prishtinë të enjten e 22 shtatorit, ku u ka kërkuar atyre edhe armë me rreze të gjatë veprimi, e ka komentuar edhe presidenti serb, Aleksandër Vuçiç.
“E di se cila është e vërteta, jam në dijeni”, tha Vuçiç, duke iu referuar lajmit të mediumit serb Novosti.
“Njerëzit që nuk e kanë lexuar lajmin duhet ta dinë se çfarë thuhet – se kryeministri i Kosovës Albin Kurti ka kërkuar artileri për rreze më të mëdha se 10 kilometra”, tha Vuçiç në intervistë për TV Pink.
Duke u thirrur në “burime diplomatike”, ky medium shkruan se ndër kërkesat e kreut të qeverisë së Kosovës, ka qenë edhe “përfshirja e raketave me rreze veprimi deri në 10 kilometra, në pakon e fundit të ndihmës ushtarake amerikane e prezantuar fillimisht nga Sekretari amerikan i Shtetit, Antony Blinken”.
Ndërkaq, “diplomatët perëndimorë i kanë garantuar Kurtit që këto çështje do t’i shtrojnë tek organet ushtarake dhe politike në Washington dhe në Londër”.
“Përfaqësuesi i Amerikës theksoi se kërkesa e Kosovës që ndër të tjera të përfshijë sistemin e mbrojtjes për bazat e reja në veri të Kosovës – në ndihmat ushtarake të destinuara për to – do të pranohet dhe se SHBA-të do t’i furnizojë me tre sisteme të tilla”.
Mediumi i afërt me Vuçiç-in: Amerikanët dhe britanikët i kanë premtuar Kurtit raketa
Kërkesë tjetër, gjithnjë sipas mediumit serb, ishte edhe pajisja me koordinatat e pikave ku potencialisht janë të vendosur njësitë serbe.
“Në fund, Kurti kërkoi nga diplomatët e QUINT-it që forcat ndërkombëtare dhe strukturat e tyre të inteligjencës t’u dorëzojnë institucioneve në Prishtinë koordinatat e vendeve ku janë stacionuar forcat ushtarake dhe policore të Serbisë gjatë patrullimit të tyre ditorë, për të cilat përfaqësuesi i Britanisë së Madhe tha do t’ia përcjellë një kërkesë të tillë autoriteteve kompetente për miratim”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
