Parlamenti i Francës ka votuar gjatë ditës së enjte të 14 tetorit se asnjë ngjarje sportive në futbollin profesionist nuk do të luhet më datë 5 maj.
Pas votimit në Senat, ishte Parlamenti që miratoi përfundimisht projektligjin, sipas të cilit asnjë ndeshje nuk do të luhet më 5 maj për nderim të viktimave në stadiumin e Furiani-t.
Çfarë ka ndodhur më 5 maj?
Ishte viti 1992, data 5 maj, dhe në gjysmëfinalen e Kupës së Francës do të përballej Marseille me Bastia-n.
Bastia ishte skuadra pritëse. Në stadiumin “Armand Cesari”, që vitet e kishin amortizuar, u vendos që të shtoheshin tribuna pasi kishin përballë Marseille-n.
Në atë kohë, Marseille ishte skuadra më e madhe në Francë. Autoritetet lokale dhanë dritën jeshile për shtimin e tribunave.
Por, përpara se ndeshja të fillonte, ajo pjesë e shtuar e stadiumit u shemb dhe u regjistruan 19 viktima dhe 2 mijë e 300 të plagosur, duke u bërë një nga ngjarjet më të rënda në futboll.
Vendimi i Parlamentit shkon në respekt të viktimave. Asnjë ndeshje nuk do të luhet në Ligue 1, Ligue 2, Kupën e Francës dhe Champions League më 5 maj.
Ndeshjet e futbollit amator do të lejohet që të luhen, por do të mbajnë një minutë heshtje në fillim të takimit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
