Termocentralet e Ukrainës në mëshirën e raketave ruse

Lufta e Rusisë kundër Ukrainës ka hyrë në një fazë të re.

Tani, sulmet me dronë dhe raketa në infrastrukturën energjetike të Ukrainës janë të shpeshta dhe masive, duke mposhtur mbrojtjen aktuale ajrore të saj.

Shpesh përfshijnë të njëjtët drone Shahed të prodhuar nga Irani të lëshuar nga Teherani në Izrael.

Duke parë përgjigjen e fuqishme ndaj atij sulmi nga aleatët e Izraelit, Presidenti ukrainas Volodymyr Zelensky vuri në dukje se kur ishte fjala për Ukrainën “retorika nuk mbron qiellim”.

Ai ka thënë se tingulli i atyre dronëve, qoftë mbi Lindjen e Mesme apo në Evropë, “duhet të shërbejë si një thirrje zgjimi për botën e lirë”.

Teksa Ukraina përpiqet të riparojë atë që mundet dhe të mbajë energjinë elektrike të rrjedhë në shtëpi dhe industri, sulmi i Rusisë nuk ka të ndalur.

Një objekt i madh afër Kievit u godit javën e kaluar dhe në verilindje, në qytetin e dytë të Ukrainës, Kharkiv, të tre termocentralet kryesore janë në rrënoja.

Oxhaqet me vija bardhekuq të Termocentralit Nr.5 të Kharkivit janë ende të dukshëm nga milje larg. Ndërtesa kryesore ka një vrimë të madhe të fryrë në zemër të saj. Rreth e rrotull është një rrëmujë prej metali të nxirë dhe betoni të copëtuar.

Sulmi i 22 marsit ishte i qëllimshëm dhe shkatërrues.

Pesë raketa ruse goditën të njëjtin vend, duke shpërthyer turbinat, gjeneratorët dhe transformatorët dhe duke e çuar fabrikën jashtë linje. Një javë më vonë, Rusia synoi përsëri termocentralet e qytetit.

Ka pasur gjashtë sulme në këtë fabrikë që nga fillimi i pushtimit në shkallë të gjerë, por ai i marsit ishte më i keqi deri tani.

Ishte gjithashtu gjëja më demoralizuese: inxhinierëve iu deshën një vit të plotë për të riparuar një pjesë të uzinës, më pas dy javë pasi u rifillua, Rusia goditi saktësisht të njëjtin vend.

Çka bën që disa të dyshojnë se agjentët rusë brenda Ukrainës po i japin informacion Moskës: termocentralet mbulojnë një territor të gjerë dhe dëmtimi ose riparimet janë të pamundura për t’u fshehur.

Por Rusia tashmë e di se ku të synojë.

Makineritë e rënda datojnë që nga BRSS, ka ende etiketa sovjetike mbi rrënojat dhe Moska ka projektet e vjetra të impianteve.

Madje dyshohet se saktësia e shtuar është më e mundshme për shkak të intensitetit të madh të sulmeve të fundit.

Në fusha përreth ka shtylla gjigante të energjisë elektrike. Por që nga marsi, asgjë nuk ka rrjedhur përgjatë linjave nga Termocentrali Nr.5, apo termocentralet e tjera të Kharkiv.

Qyteti duhet të sjellë energji nga Ukraina perëndimore, që do të thotë furnizim të kufizuar dhe ndërprerje të rregullta elektrike. Rusët kanë synuar edhe nënstacionet e energjisë elektrike.

Autoritetet lokale po përpiqen të minimizojnë ndikimin dhe të zvogëlojnë kohën që shtëpitë dhe bizneset mbeten në errësirë.

Banorët sakaq kanë mësuar të karikojnë pajisjet e tyre dhe bankat e shumta të energjisë, sapo ndizet rryma. Ata gjithashtu mbajnë rezerva uji për të pirë dhe larje.

Metroja e Kharkiv-it është rikthyer në punë, ndonëse në përshtatje, po ashtu edhe semaforët. Por me një furnizim jo të besueshëm me energji që mund të përkeqësohet, bizneset po krijojnë zgjidhjet e tyre.

Kharkiv është një qendër e madhe botuese dhe Oleksandr Popovich, shefi i një firme të madhe printimi, thotë se prej javësh ata janë mbështetur në tre gjeneratorë.

Në fillim të luftës, një raketë goditi 100 metra nga linja kryesore e prodhimit.

“Shkatërroi të gjithë magazinimin tonë dhe 10 ton letër. Por një ditë e vështirë vetëm na bën më të ashpër”, ka thënë Popovich, duke rrezatuar frymën e sfidës dhe vendosmërisë që është bërë marka tregtare e Kharkiv.

“Fatkeqësisht nuk e rregulloj dot rrymën”.

“Por secili duhet të bëjë punën e vet. E imja është të prodhojmë libra deri në fitoren tonë. Ne duhet të vazhdojmë të punojmë. Ne duhet t’u japim njerëzve në Ukrainë mundësinë për të lexuar libra të rinj”.

Firma mendoi të zhvendosej më larg nga kufiri rus, por ata vendosën të qëndrojnë dhe madje kanë investuar në rritjen e prodhimit.

Tani që Rusia po synon Kharkiv-in me fokus të përtërirë, ai pranon se është shqetësuese.

“Mendoj për ushtrinë tonë. Ushtarët tanë duhet të dinë se nuk po mbrojnë qytetet boshe. Ata po mbrojnë qytetet me njerëz”.

Dhjetëra nga stafi i tij janë regjistruar për të luftuar. Fotografia e njërit, të vrarë në aksion në vijën e frontit lindor, varet pranë hyrjes kryesore.

Komandanti i përgjithshëm i Ukrainës, gjenerali Oleksander Syrskyi, ka thënë në fundjavë se situata përgjatë pjesëve të vijës së frontit është “përkeqësuar ndjeshëm”.

Moti më i ngrohtë dhe toka më e fortë po e ndihmojnë Rusinë të nisë sulmet me automjete të blinduara dhe t’i vendosë forcat ukrainase nën presion të ri, sipas tij.

Luftimet rreth Chasiv Yar në Donbas janë veçanërisht intensive. Gjenerali beson se Rusia dëshiron të marrë territorin deri më 9 maj, një datë simbolike kur Moska feston fitoren sovjetike ndaj Gjermanisë naziste.

Gjenerali i ka përshkruar përpjekjet heroike të trupave të tij në “frenimin e sulmeve të përditshme të armikut”. Por ai ka përmendur gjithashtu nevojën për të përmirësuar gjendjen e tyre “morale dhe psikologjike”.

Pas më shumë se dy vjetësh, ata janë të rraskapitur.

Por kur deputetët në Kiev më në fund votuan për një ligj të ri që rregullon mënyrën e mobilizimit të burrave, amendamenti që vendos një kufi për sa kohë duhet të luftojnë ishte hequr.

Kundër ushtrisë më të madhe të armikut, Ukraina ka nevojë për të gjithë ushtarët që mund të grumbullojë.

Rrënimi i moralit është komplikuar nga mungesa e municioneve që tani arrijnë në vijat e frontit dhe dështimi i vazhdueshëm i Kongresit të SHBA-ve për të miratuar një paketë kritike ndihme për Kievin.

Trupat e Ukrainës ndjejnë se lufta e tyre rrëshqet në agjendën ndërkombëtare.

Dhe tani ka një arsye të re për shqetësim, pasi shumë venë re ndryshimin në përgjigjen ndaj krizës në rritje në Lindjen e Mesme.

Izraeli ka pasur mbështetje të drejtpërdrejtë për të mbrojtur qiellin e tij nga raketat dhe dronët iranianë, edhe pse të njëjtat vende e kufizojnë ndihmën e tyre në Ukrainë, e cila është nën sulmin rus çdo ditë.

“Bota nuk mund të presë që të vazhdojnë diskutimet”, ka thënë presidenti i Ukrainës. “Fjalët nuk ndalojnë dronët dhe nuk përgjojnë raketat. Vetëm ndihma e prekshme e bën. Ndihma që ne presim”.

Gjermania sapo ka premtuar të dërgojë një njësi shtesë të mbrojtjes ajrore Patriot në Ukrainë. Duke falënderuar kancelarin Olaf Scholz për mbështetjen në një “moment kritik”, Zelensky u bëri thirrje vendeve të tjera të ndjekin shembullin.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.