Tërmeti Turqi-Siri: Bilanci i viktimave do të “dyfishohet”, sipas një zyrtari të OKB-së

Numri i viktimave nga tërmeti i fuqishëm që arriti në më shumë se 29 mijë të vdekur në Turqi dhe Siri të dielën do të “dyfishohet ose më shumë”, paralajmëroi kreu i agjencisë humanitare të OKB-së, Martin Griffiths.

Ky i fundit shkoi në Turqi të shtunën në qytetin Kahramanmaras, epiqendër e tërmetit me magnitudë 7.8 që ndodhi më 6 shkurt, ku humbën jetën 24 mijë e 617 persona në vend dhe 3 mijë e 574 në Siri.

“Unë mendoj se është e vështirë të vlerësohet (bilanci) pikërisht sepse duhet të kalojmë nën rrënoja, por jam i sigurt se do të dyfishohet, ose më shumë”, tha ai për Sky News. “Ne nuk kemi filluar ende të numërojmë bilancin e viktimave”.

Dhjetëra mijëra shpëtimtarë vazhdojnë të kërkojnë rrënojat në të ftohtin e acartë, gjë që shton mjerimin e përjetuar nga miliona njerëz të prekur.

Kombet e Bashkuara kanë paralajmëruar se të paktën 870 mijë njerëz kanë nevojë urgjente për ushqime të ngrohta në Turqi dhe Siri.

Deri në 5.3 milionë aktualisht mendohet se janë të pastrehë vetëm në Siri.

Gati 26 milionë njerëz janë prekur nga tërmeti, tha OBSH-ja të shtunën, duke apeluar për donacione prej 42.8 milionë dollarësh për të financuar nevojat e menjëhershme shëndetësore.

Agjencia e Menaxhimit të Fatkeqësive të Turqisë tha se më shumë se 32 mijë anëtarë të organizatave turke po merrnin pjesë në kërkim. Përveç kësaj, janë 8 mijë e 294 shpëtimtarë nga jashtë.

“Së shpejti personat përgjegjës për kërkimin dhe shpëtimin do t’i lënë vendin agjencive humanitare, detyra e të cilave është të kujdesen për numrin e jashtëzakonshëm të njerëzve të prekur gjatë muajve të ardhshëm”, tha gjithashtu Martin Griffiths në një video të postuar në profilin e tij në Twitter.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.