Simiç: Së pari de-eskalimi – pastaj flasim për zgjedhje

Nënkryetari i Listës Serbe – partisë më të madhe të serbëve të Kosovës, njëherit të dirigjuarit e Beogradit – Igor Simiç, në një intervistë për “Zërin e Amerikës” në gjuhën serbe, ka thënë se “është e kotë” të flasësh për zgjedhje të reja në Veri, pa ndodhur de-eskalimi.

Këtë komete ai i bëri pas vizitës që kishte së bashku me kolegun nga partia e tij, Slavko Simiç, në Uashington, ku u takuan me të dërguarin special të Shteteve të Bashkuara të Amerikës për Ballkanin Perëndimor, Gabriel Escobar.

“Nëse shikoni hapat, de-përshkallëzimi vjen i pari dhe pastaj flasim për zgjedhje. Nëse nuk ka de-përshkallëzim, historia për zgjedhjet është një histori hipotetike, nuk dua ta drejtoj për respekt për njerëzit që më mbështetën si përfaqësues të tyre dhe ata që protestojnë sot në mënyrë paqësore para komunave të tyre. Ata po kërkojnë, imagjinoni, të hyjnë në komunë dhe të bëjnë punën e tyre duke ofruar shërbime për serbët dhe shqiptarët dhe boshnjakët dhe të gjitha komunitetet tjera”, tha Simiç.

Ai refuzoi kategorikisht që momentalisht të mbahen zgjedhje të reja në Veri, pas atyre të 23 prillit, të cilat Lista Serbe i kishte bojkotuar, pasi që theksoi se “pa plotësuar kushtet që na i kanë vënë qytetarët, nuk mund të diskutojmë mundësinë e zgjedhjeve”.

Madje, ai tregoi se këtë ia ka treguar edhe ndërkombëtarëve, përfshirë këtu edhe Escobar-it të cilin këtë javë e takoi në ambientet e Departamentit amerikan të Shtetit.

“Po, dhe ne kemi hasur në një kuptim të madh të një qëndrimi të tillë. Dallimi i vetëm është se tek ata ka shpresë se do të ndodhë de-përshkallëzimi, dhe unë si njeri që jetoj në Kosovë nuk e shoh atë de-përshkallëzimin. Më shqetëson periudha që na pret, se dikush në Prishtinë do ta shfrytëzojë periudhën e këtyre pushimeve për të krijuar një problem tjetër në veri të Kosovës me lëvizje të njëanshme”, pretendon ai.

“Në këtë kuptim, ne kërkuam qartë që SHBA, përmes popullit të saj, veçanërisht përmes institucioneve të sigurisë si KFOR-i, i cili ka legjitimitet dhe obligim sipas Rezolutës 1244, të jetë më prezente në Veri të Kosovës dhe të parandalojë cilindo që dëshiron të kërcënojë paqen në atë zonë dhe në të njëjtën kohë në Ballkanin Perëndimor”, shtoi ai.

Ndryshe, Qeveria e Kosovës e ka pranuar një pjesë të planit të de-përshkallëzimit, të prezantuar nga BE-ja dhe me mbështetje të fuqishme nga SHBA-ja, ku parashihet reduktimi i policisë nga objektet komunale të komunave Veriore për 25 për qind, si dhe mbajtjen e zgjedhjeve të reja atje.

Pranimi kishte ndodhur me 10 korrik, pas takimit në mes të kryenegociatorit të Kosovës, Besnik Bislimi, me të dërguarin special të Bashkimit Evropian për dialogun Kosovë-Serbi, në Bratislavë të Sllovakisë.

Për shkak të refuzimit të mëhershëm të Kosovës për të pranuar planin e de-eskalimit Bashkimi Evropian kishte vendosur masa ndëshkuese ndaj Kosovës, si në rrafshin politik dhe në atë ekonomik.

Nga BE-ja kishin bërë me dije se kur Kosova të pranohej plani i de-eskalimit edhe masat ndëshkuese do të largoheshin.

Mirëpo, përkundër që Kosova me 10 korrik pranoi një pjesë të planit, nga BE-ja po kërkojnë veprime shtesë të qeverisë së udhëhequr nga Albin Kurti, për t’i larguar masat ndëshkuese.

Situata në Veri të Kosovës ishte tensionuar që nga 26 maji, kur qeveria mori vendim që policia t’i instalojë në zyrat e tyre kryetarët e komunave Veriore – Leposaviq, Zveçan dhe Zubin Potok – çka shkaktoi reagim të serbëve lokalë të cilët janë shumicë në atë pjesë të territorit të Kosovës.

Situatë më e tensionuar ishte të hënën e 29 majit, kur protestuesit e dhunshëm serbë sulmuan ushtarët e KFOR-it, duke lënë të lënduar dhjetëra prej tyre, kryesisht italianë dhe hungarezë.

Situata agravoi edhe më tej kur me 14 qershor, xhandarmëria serbe kidnapoi tre policë të Kosovës në pikën kufitare, të cilët u liruan pas presionit të madh të bashkësisë së organizuar ndërkombëtare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.