“Shkëputja e Republikës Sërpska nga BeH” – SHBA-të: Retorika separatiste e Dodik-ut e rrezikshme për stabilitetin dhe sigurinë e Ballkanit Perëndimor

Ambasada e Shteteve të Bashkuara të Amerikës në Bosnje e Hercegovinë, ka dënuar retorikën ultra-nacionaliste e irredentiste të Millorad Dodikut, presidentit të Republikës Sërpska – eniteti serb në Bosnje dhe Hercegovinë – i cili kërcënoi me shkëputje të entitetit në fjalë nga Bosnja e Hercegovina.

​Sipas Ambasadës Amerikane, deklaratat e Dodik-ut janë të rrezikshme dhe kundër Marrëveshjes së Dayton-it.

“Retorika separatiste e Milorad Dodik është e rrezikshme jo vetëm për stabilitetin dhe sigurinë e Bosnjë-Hercegovinës, por për stabilitetin dhe sigurinë e të gjithë rajonit të Ballkanit Perëndimor”.

Deklaratat si kjo, si dhe veprimet e Dodik-ut kundër Marrëveshjes së Dayton-it dhe përpjekjet për të minuar shtetin e Bosnjë-Hercegovinës, sipas Ambasadës Amerikane janë pikërisht arsyeja pse Dodik është nën sanksionet e SHBA-së.

“Sipas kushtetutës së Bosnje-Hercegovinës nuk ka të drejtë që një ent apo ndonjë njësi tjetër nënshtetërore të shkëputet. Iluzionet e Dodikut janë një devijim i rrezikshëm nga e ardhmja paqësore, demokratike dhe e begatë që qytetarët e Bosnjë dhe Hercegovinës, përfshirë edhe ata që jetojnë në Republika Sërpska”.

Shtetet e Bashkuara, thekson ambasada ndër të tjera, gjithmonë kanë mbështetur dhe do të vazhdojnë të mbështesin integritetin territorial, sovranitetin dhe karakterin multietnik të Bosnjë dhe Hercegovinës.

Milorad Dodik’s separatist rhetoric and threats to secede from Bosnia and Herzegovina are anti-Dayton and dangerous, not only to the stability and security of Bosnia and Herzegovina, but to the stability and security of the entire Western Balkans region.  Statements like this as…

— US Embassy Sarajevo (@USEmbassySJJ) November 7, 2023

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.