Shefi i Shtabit të Izraelit zhvillon bisedime me zyrtarët marokenë në Rabat

Shefi i Shtabit të Izraelit, gjenerallejtënant Aviv Kohavi nisi të martën një vizitë tre-ditore në Marok, në udhëtimin e parë të një komandanti ushtarak izraelit në vendin e Afrikës së Veriut.

Vizita e Kohavi-t ka për qëllim forcimin e bashkëpunimit dypalësh ushtarak dhe të sigurisë.

Ai mbërriti në Marok të hënën në mbrëmje dhe u takua fillimisht me Inspektorin e Përgjithshëm të Forcave të Armatosura Mbretërore, gjenerallejtënant Belkhir El Farouk, komandant i rajonit jugor, në selinë e Forcave të Armatosura Mbretërore në Rabat.

Kohavi u takua gjithashtu me Ministrin e Mbrojtjes Abdellatif Loudiyi dhe është planifikuar të zhvillojë bisedime me zyrtarë të tjerë të lartë ushtarakë.

Ai kishte deklaruar se ky udhëtim është pjesë e përpjekjeve të përgjithshme të ushtrisë izraelite për të zgjeruar bashkëpunimin ushtarak me vendet e tjera.

Maroku kishte ndërprerë marrëdhëniet me Izraelin në vitin 2000 pas shpërthimit të intifadës së dytë palestineze, por rivendosi lidhjet dy dekada më vonë në një marrëveshje që pa Uashingtonin të njohë sovranitetin e Rabatit mbi Saharanë Perëndimore të diskutueshme.

Që atëherë, një rrjedhë e qëndrueshme e zyrtarëve marokenë dhe izraelitë kanë vizituar vendet e njëri-tjetrit dhe kanë nënshkruar marrëveshje bashkëpunimi në fusha të ndryshme.

Ato përfshinin ministrin izraelit të Mbrojtjes Benny Gantz, i cili në një vizitë në mbretëri në nëntor të vitit të kaluar, nënshkroi një marrëveshje sigurie duke e bërë më të lehtë për Rabatin blerjen e eksporteve të teknologjisë së lartë nga industria e mbrojtjes e Izraelit.

Në qershor, vëzhguesit ushtarakë izraelitë për herë të parë morën pjesë në stërvitjen vjetore ushtarake “Luani Afrikan”, stërvitje të gjera që përfshinin mijëra personel nga disa vende, të bashkëorganizuara nga Maroku dhe Shtetet e Bashkuara.

Dhe në mars 2021, një delegacion i ushtrisë izraelite u takua me oficerët marokenë në Rabat, në vizitën e parë të këtij lloji që nga marrëveshja e normalizimit të vitit 2020 e ndërmjetësuar nga administrata e ish-presidentit amerikan Donald Trump, duke nënshkruar një marrëveshje bashkëpunimi ushtarak.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.