SHBA qëndron pas një të tretës së planeve të zgjerimit të prodhimit të naftës dhe gazit

Shtetet e Bashkuara të Amerikës përbëjnë më shumë se një të tretën e zgjerimit të prodhimit global të naftës dhe gazit të planifikuar deri në mesin e shekullit.

Kjo paçka pretendimeve për udhëheqje klimatike.

Kanadaja dhe Rusia kanë planet e ardhshme më të mëdha të zgjerimit, të llogaritura në bazë të sasisë së dioksidit të karbonit që ka gjasa të prodhohet nga zhvillimet e reja, e ndjekur nga Irani, Kina dhe Brazili.

Emiratet e Bashkuara Arabe, të cilat do të presin samitin vjetor të klimës të OKB-së këtë vit, Cop28 në Dubai në nëntor, janë të shtatat në listë.

Në një raport nga grupi Oil Change International, të dhënat kanë treguar se SHBA-të, Kanadaja, Australia, Norvegjia dhe Britania e Madhe do të jenë përgjegjëse për pak më shumë se gjysmën e të gjithë zgjerimit të planifikuar nga fushat e reja të naftës dhe gazit deri në vitin 2050.

Emetimet e gazeve serrë nga i gjithë zgjerimi i naftës dhe gazit që është planifikuar në tre dekadat e ardhshme do të ishin më se të mjaftueshme për të çuar temperaturat globale përtej kufirit prej 1.5 gradë Celsiusmbi nivelet para-industriale që vendet ranë dakord në vitin 2021 në Cop26 në Glasgow.

Agjencia Ndërkombëtare e Energjisë paralajmëroi në vitin 2021 se asnjë kërkim dhe zhvillim i ri i naftës dhe gazit nuk mund të ndodhte nëse bota do të qëndronte brenda kufirit prej 1.5 gradë.

Por vetëm një pjesë e vogël e vendeve me rezerva nafte dhe gazi po pranojnë kërkime dhe shpime të reja.

Romain Ioualalen, drejtuesi i politikës globale në Oil Change International dhe bashkëautor i raportit, ka thënë se vendet duhet të ndalojnë zgjerimin e karburanteve fosile.

“Është e thjeshtë: kur je në një gropë, hapi i parë është të ndalosh gërmimin”, ka thënë ai.

“Kriza klimatike është globale në natyrë, por është tmerrësisht e padrejtë. Një pjesë e vogël e vendeve më të pasura të botës po rrezikojnë të ardhmen tonë duke injoruar vullnetarisht thirrjet për të eliminuar me shpejtësi karburantet fosile”.

Raporti, i titulluar Planet Wreckers: si planet e nxjerrjes së naftës dhe gazit të 20 vendeve rrezikojnë të mbyllen në kaosin klimatik, ka zbuluar se 20 vende ishin përgjegjëse për planet për zhvillime të reja të naftës dhe gazit deri në vitin 2050 që do të shtonin rreth 173 miliardë ton dioksid karboni në atmosferë.

Kjo sasi është e njëjtë me emetimet gjatë gjithë jetës së 1 mijë e 100 termocentraleve me qymyr, ose më shumë se 30 vjet të emetimeve vjetore të SHBA-ve.

Nëse vendet do të hiqnin dorë nga sjellja e fushave të reja të naftës dhe gazit në prodhim, rënia e fushave ekzistuese do të nënkuptonte se prodhimi global i naftës dhe gazit do të ngadalësohej me rreth 2% në vit nga tani deri në vitin 2030 dhe 5% në vit nga viti 2030 në vitin 2050.

Sekretari i përgjithshëm i OKB-së, António Guterres, ka rritur thirrjet për vendet që të largohen nga karburantet fosile.

Ai ka paralajmëruar për “çmenduri morale dhe ekonomike”.

Ai do të thërrasë një konferencë të liderëve botërorë më vonë këtë muaj në New York, në përpjekje për të nxjerrë angazhime të reja për të trajtuar krizën klimatike.

Po ashtu u ka thënë udhëheqësve botërorë se do të lejohen të marrin pjesë në samitin, në margjinat e asamblesë së përgjithshme vjetore të OKB-së, vetëm nëse mund të tregojnë se kanë plane të qarta zbatimi për të ulur emetimet e tyre të gazeve serrë.

Një zëdhënës i Departamentit të Mbretërisë së Bashkuar për Sigurinë e Energjisë, ka thënë se ky raport “injoron hapat e mëdhenj që kemi ndërmarrë për të reduktuar varësinë nga karburantet fosile”.

“Midis viteve 1990 dhe 2021, ne ulëm emetimet me 48% ndërsa rritëm ekonominë tonë me 65% – duke u dekarbonizuar më shpejt se çdo vend tjetër i G7-s”.

“Edhe në vitin 2050, kur kemi arritur zero neto, vlerësohet se Mbretëria e Bashkuar mund të jetë ende duke përdorur një të katërtën e gazit që ne bëjmë tani dhe, si dhe duke forcuar sigurinë tonë energjetike, hulumtimi i pavarur ka treguar se gazi i prodhuar në vend është mesatarisht katër herë më i pastër se importi”.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.