Rusia shpall fitore në fushëbetejë, Ukraina kërkon ndihmë ushtarake

Autoritetet ruse deklaruan të mërkurën se kishin thyer dy linja të fortifikuara të mbrojtjes ukrainase në frontin lindor.

Kievi zyrtar sakaq i përshkruan kushtet atje si të vështira dhe aleatët perëndimorë njoftuan më shumë ndihmë ushtarake duke përfshirë raunde artilerie.

Lajmi u bë i ditur nga agjencia “Reuters”.

Ministria ruse e Mbrojtjes tha se ukrainasit ishin tërhequr përballë sulmeve ruse në rajonin e Luhansk-ut, megjithëse nuk dha detaje dhe Reuters nuk ishte në gjendje të verifikonte në mënyrë të pavarur këtë dhe raporte të tjera të fushëbetejës.

“Gjatë ofensivës… trupat ukrainase u tërhoqën rastësisht në një distancë deri në 3 kilometra nga linjat e pushtuara më parë”, tha Ministria në aplikacionin e mesazheve Telegram. “Edhe linja e dytë më e fortifikuar e mbrojtjes së armikut nuk mund të mbante përparimin e ushtrisë ruse”.

Ministria nuk specifikoi se në cilën pjesë të rajonit të Luhansk-ut u zhvillua ofensiva.

Zyra e presidentit ukrainas Volodymyr Zelenskiy tha se forcat e Kievit kishin zmbrapsur disa sulme ruse në Luhansk, por shtoi se situata në rajon “mbetet e vështirë”.

Kremlini ka intensifikuar sulmet në një zonë të Ukrainës jugore dhe lindore në javët e fundit dhe një ofensivë e re e madhe është parashikuar gjerësisht.

Përpjekjet kryesore të Rusisë janë përqendruar në qytetin Bakhmut në provincën Donetsk, ngjitur me Luhansk-un.

Kapja e Bakhmut do t’i jepte Rusisë një hap për të avancuar në dy qytete më të mëdha, Kramatorsk dhe Sloviansk në Donetsk, duke i dhënë asaj vrull pas muajsh pengesash përpara përvjetorit të parë të pushtimit të 24 shkurtit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.