Roja bregdetare greke hap zjarr ndaj anijes turke

Anijet e rojes bregdetare greke hapën zjarr ndaj një anijeje mallrash që lundronte në ujërat ndërkombëtare në Detin Egje, duke përshkallëzuar tensionet me Turqinë që janë rritur javët e fundit.

“Nuk pati viktima”, tha një deklaratë e rojes bregdetare turke.

Pas “zjarrit ngacmues” nga dy anije greke, dy anije të rojes bregdetare turke shkuan në zonë dhe varkat greke u larguan.

Roja bregdetare greke konfirmoi se gjuajti “të shtëna paralajmëruese” ndaj një anijeje që “lëvizte në mënyrë të dyshimtë” në ujërat territoriale greke pranë ishullit Lesbos.

“Kapiteni i anijes së mallrave refuzoi të lejonte një inspektim dhe më vonë u shoqërua në ujërat e afërta turke”, thanë zyrtarët e rojes bregdetare greke, duke theksuar se ata informuan autoritetet detare në Turqi për incidentin.

Zona është e njohur për shumë anije që sjellin emigrantë nga Turqia në vendet e Bashkimit Evropian, Greqi dhe Itali.

Roja bregdetare greke thotë se kontrollon rregullisht anijet që sillen në mënyrë të dyshimtë në Egje.

Vendet fqinje janë përfshirë në mosmarrëveshje për dekada dhe fërkimet janë rritur në javët e fundit, me të dyja palët që pretendojnë shkelje të hapësirës ajrore.

Zyrtarët grekë kanë ngritur shqetësime për një tjetër shpërthim konflikti në Evropë pas luftës së Rusisë në Ukrainë.

Ankaraja ka akuzuar Athinën për “pushtimin” e disa ishujve të Egjeut dhe për ngacmimin e avionëve turq me sistemet e mbrojtjes S-300 të prodhimit rus të stacionuar atje.

Athina i mohon pretendimet.

Greqia thotë se duhet të mbrojë ishujt e saj lindorë, duke përfshirë pikat e nxehta turistike Rodos dhe Kos, të cilat janë shumë më afër Turqisë sesa me kontinentin grek.

Edhe pse të dyja janë anëtarë të NATO-s, Turqia dhe Greqia kanë mosmarrëveshje dekadash mbi një sërë çështjesh, duke përfshirë pretendimet territoriale në Detin Egje dhe mosmarrëveshjet mbi hapësirën ajrore atje.

Mosmarrëveshjet i kanë sjellë ata në prag të luftës tre herë në gjysmë shekullin e kaluar.

Tensionet u ndezën në vitin 2020 mbi të drejtat e shpimit eksplorues në zonat e Detit Mesdhe, ku Greqia dhe Qipro pretendojnë zona ekskluzive ekonomike, duke çuar në një bllokim detar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.