Qershori i këtij viti ishte më i ngrohti në nivel global

Qershori i vitit 2023 ishte qershori më i ngrohtë global në rekord për matjet e temperaturës së detit dhe ajrit, sipas Shërbimit të Ndryshimeve Klimatike të Bashkimit Evropian Copernicus.

“Ishte qershori më i ngrohtë globalisht me pak më shumë se 0.5 gradë Celsius mbi mesataren 1991-2020, duke mposhtur rekordin e mëparshëm qershorin e 2019 me një diferencë të konsiderueshme”, thuhet në raportin e Copernicus.

Copernicus e bazon llogaritjen e tij në analizat e krijuara nga kompjuteri që përdorin miliarda të dhëna nga satelitët, anijet, avionët dhe stacionet e motit në mbarë botën, transmeton Reuters.

Copernicus tha se Evropa përjetoi temperatura rekord gjatë qershorit, ndërsa pjesë të Amerikës së Veriut, Azisë dhe Australisë lindore ishin dukshëm më të ngrohta se normalja për kohën e vitit.

Temperaturat e detit ishin rekord për qershorin për shkak të ndryshimeve afatgjata dhe pjesërisht të El Nino-s, një fenomen natyror klimatik që nxit ciklonet tropikale në Paqësor dhe rrit reshjet.

“Anomali jashtëzakonisht të ngrohta të temperaturës së sipërfaqes së detit u regjistruan në Atlantikun e Veriut… Valë ekstreme të të nxehtit detar u vëzhguan rreth Irlandës, Mbretërisë së Bashkuar dhe në Detin Baltik”, thuhet në raportin e Copernicus.

Akulli i Antarktidës kishte shtrirjen e tij më të ulët në qershor që nga fillimi i vëzhgimeve satelitore, 17 për qind nën mesataren, shtoi Copernicus.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.