Qatargate: Prokuroria belge kundërshton lirimin e Eva Kaili-t

Prokuroria federale belge kundërshtoi të enjten e 19 janarit, lirimin e eurodeputetes greke Eva Kaili.

Ish-zyrtarja e lartë e Parlamentit Evropian gjendet pas hekurave prej gjashtë javësh.

Kjo, në kuadër të skandalit të dyshuar të korrupsionit në PE që përfshin veçanërisht Katarin.

Lajmi u bë i ditur nga agjencia franceze “AFP”, duke cituar avokatët e Kaili-t.

Përpara dhomës së këshillit të Brukselit, e cila nisi punimet me dyer të mbyllura, avokatët e socialistes kërkuan masa alternative ndaj paraburgimit “si byzylyku elektronik”, tha njëri prej tyre, André Risopoulos, në fund të seancës.

Por qëndrimi i prokurorisë ishte “fuqishëm negativ”, shtoi avokati.

“Zyra e Prokurorisë Federale beson se të gjitha rreziqet ekzistojnë; rreziku i rrjedhjeve, rreziku i marrëveshjes së fshehtë me palët e treta dhe rreziku i shkatërrimit të provave”, vazhdoi Risopoulos.

Dhoma e këshillit, juridiksioni i kontrollit të udhëzimit dhe paraburgimit, duhej të jepte vendimin në fund të ditës.

Eva Kaili, 44 vjeçe, e cila u hoq nga detyra e saj si zëvendëspresidente e Parlamentit Evropian në mes të dhjetorit, është një nga katër personat e burgosur në këtë skandal të quajtur “Qatargate”, por në të cilin përmendet edhe Maroku.

Ajo dyshohet se ka marrë shuma të mëdha parash nga fuqitë e huaja për të ndikuar në deklaratat dhe qëndrimet në Parlamentin Europian në favor të këtyre vendeve.

Eva Kaili mohon çdo korrupsion, përsëritën avokatët e saj të enjten, të cilët akuzojnë drejtësinë belge se e ka bërë atë “të paguajë çmimin më të lartë” duke e mbajtur në paraburgim “në kushte të vështira”.

Avokati i saj grek Mihalis Dimitrakopoulos denoncoi më herët “torturën” për një “izolim të fundit për gjashtëmbëdhjetë orë në një qeli policie” gjatë një seance.

Sipas Risopoulos, zyrtarja e zgjedhur greke e burgosur mundi të shihte vetëm “dy herë në gjashtë javë fëmijën e saj 23 muajsh”, të cilin e kishte me partnerin e saj Francesco Giorgi.

I burgosur në këtë aferë është edhe asistenti i parlamentit italian, njësoj si Pier Antonio Panzeri, një ish-deputet socialist që është një figurë qendrore dhe pranoi të martën më 17 janar të bashkëpunonte me drejtësinë në këmbim të një dënimi të kufizuar me burg.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.