Presidenti meksikan thotë se do të shqyrtojë kërkesën e ‘El Chapo’

Presidenti i Meksikës tha të mërkurën se qeveria e tij do të shqyrtojë një kërkesë nga bosi i burgosur i drogës Joaquin “El Chapo” Guzman për t’u kthyer në Meksikë, me sa duket për të vuajtur dënimin e tij.

Lajmi u bë i ditur nga agjencia “Associated Press”.

Guzman, 64 vjeç, u dënua me burgim të përjetshëm në Shtetet e Bashkuara për një komplot droge që përhapi vrasje dhe kaos për më shumë se dy dekada.

‘El Chapo’ ka jetuar në kushte të këqija në burg që nga dënimi i tij në vitin 2019, tha José Refugio Rodríguez, një avokat meksikan që pretendon se e përfaqëson atë.

Rodríguez tha për mediat lokale se Guzman nuk ka pasur akses të mjaftueshëm në rrezet e diellit, vizitat, ushqimin e mirë apo kujdesin mjekësor.

Ambasada meksikane në Washington tha në llogarinë e saj në Twitter se kishte marrë një email nga Rodríguez në lidhje me këtë çështje dhe ia kishte dorëzuar Departamentit të Marrëdhënieve me Jashtë të Meksikës.

Presidenti Andrés Manuel López Obrador tha “ne do ta shqyrtojmë atë”, duke shtuar: “Duhet ta mbani gjithmonë derën hapur kur bëhet fjalë për të drejtat e njeriut”.

Shtetet e Bashkuara dhe Meksika kanë një marrëveshje transferimi në burg që lejon të burgosurit e dënuar në një vend të kryejnë dënimin në vendin e tyre në rrethana të caktuara.

Por duke pasur parasysh krimet e Guzman, dënimin e tij dhe rreziqet që ai supozohet se paraqet ende, shumë dyshojnë se marrëveshja do të zbatohej në rastin e tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.