Presidenti i Emirateve të Bashkuara Arabe, Sheiku Mohamed bin Zayed Al Nahyan ka pritur në një takim kryeministrin shqiptar, Edi Rama, ku është diskutuar për forcimin e bashkëpunimit mes palëve, duke përfshirë edhe fushat e përbashkëta të interesit, ku dy vendet kërkojnë të zgjerojnë raportet.
Lajmi është bërë i ditur nga mediat e Emirateve, duke iu referuar Presidencës.
Takimi është zhvilluar në Abu Dhabi, ku Rama po merr pjesë në Samitin e Qeverive Botërore 2024.
Të dy palët hulumtuan mënyra për të zgjeruar interesat e përbashkëta dhe për të shfrytëzuar mundësitë për të nxitur një të ardhme më të mirë për popujt e tyre, veçanërisht në forcimin e bashkëpunimit ekonomik, investues dhe zhvillimor.
Takimi trajtoi gjithashtu temat në agjendën e Samitit të Qeverive Botërore dhe rëndësinë e samitit në pasurimin e dialogut global mbi qeveritë e ardhshme për t’i shërbyer zhvillimit në mbarë botën.
Lidhja me Emiratet ka ardhur duke u forcuar për Shqipërinë, veçanërisht në vitet e fundit.
Gjatë një takimi në mars 2022, Rama u prit nga sundimtari i Dubait, Sheikh Mohammed bin Rashid Al Maktoum.
Rama takim me sundimtarin e Dubait: Emiratet, të gatshme për të rritur bashkëpunimin me Shqipërinë
Në fjalën e tij, zëvendëspresidenti dhe kryeministri i Emirateve të Bashkuara Arabe shprehu gatishmërinë e Emirateve të Bashkuara Arabe për të zgjeruar bazën e bashkëpunimit me Shqipërinë.
Rashid Al Maktoum vlerësoi gjithashtu rritjen e ndjeshme të marrëdhënieve mes dy vendeve.
Kryeministri i Shqipërisë u shpreh i lumtur për vizitën në Emiratet e Bashkuara Arabe dhe takimin me sundimtarin.
Rama, sipas mediave lokale, theksoi gjithashtu rëndësinë e zgjerimit të horizontit të bashkëpunimit për të çuar përpara interesat reciproke të të dy vendeve.
Ai vlerësoi organizimin e jashtëzakonshëm të Expo 2020 Dubai dhe aftësinë e Dubait për të pritur me sukses ngjarje globale të klasit botëror të kësaj shkalle.
Gjatë vizitës së tyre në pavijonin e Shqipërisë, që ndodhet në Qarkun e Lëvizshmërisë, të dy drejtuesit u njohën me veçoritë e ndryshme të pavijonit, i cili tregon diversitetin mjedisor dhe kulturor të Shqipërisë.
Pavijoni u ofron vizitorëve një turne panoramik të mrekullive natyrore të vendit, duke përdorur realitetin virtual, tingujt e natyrës, ekranet digjitale dhe më shumë.
Ai gjithashtu i lejon vizitorët të mësojnë se si vendi po bëhet një destinacion kryesor për turizmin e qëndrueshëm.
Pavijoni trekatësh është një grup “kutish” prej druri të mbështjellë brenda një skulpture kinetike që simbolizon migrimin e zogjve nga Polonia në Gadishullin Arab.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com