Policia e Kosovës përmes një komunikate për media ka njoftuar se është sulmuar në tri raste të ndryshme me armë zjarri nga disa persona të strukturave ilegale serbe në pjesën veriore të Kosovës, përkatësish afër Liqenit të Ujmanit.
“Persona nga grupe të caktuara kriminale të cilat kanë kryer bllokimin e disa rrugëve në veri të vendit, nga lokacione të ndryshme, në tri raste kanë shtënë me armë zjarri në drejtim të njësiteve policore të cilat kanë qenë në detyrë zyrtare në afërsi të pendës së liqenit të Ujmanit, në rrugën që shpie në drejtim të Pikës Kufitare të Bërnjakut”.
Siç thuhet në komunikatë, “njësitet policore, në vetëmbrojtje janë detyruar t’iu kundërpërgjigjen me armë zjarri personave/grupeve kriminale, të cilat janë zmbrapsur dhe larguar në drejtim të panjohur”.
Gjithashtu, bazuar në informacionet e siguruara nga njësitet policore në terren, edhe në disa lokacione të ndryshme janë dëgjuar të shtëna me armë zjarri, por nga policia kanë bërë të ditur se deri më tani, nuk ka informacione për ndonjë person të lënduar apo dëme të mundshme të shkaktuara.
“Policia e Kosovës mbetet e përkushtuar në realizimin e detyrave dhe autorizimeve ligjore në interes të ruajtjes së sigurisë publike dhe rendit kushtetues”, thuhet mes tjerash.
Ndryshe, rrugët drejt pikave kufitare në Jarinjë dhe Bërnjak janë mbyllur përkohësisht, pasi serbët lokalë kanë barrikaduar atë zonë me qëllim të pengimit të dërgimit të ish-policit tashmë të arrestuar, Dejan Pantiç, drejt organeve të drejtësisë në Prishtinë.
Tensionet janë rritur që nga 6 dhjetori, kur u dëmtuan zyrat e Komisionit Komunal të Zgjedhjeve në Mitrovicë të Veriut dhe Zubin Potok.
Që nga ajo kohë, në komunat me shumicë serbe, ka pasur të shtëna me armë zjarri, hedhje të granatave dhe shok bombave, ndërsa gjatë patrullimit, një zyrtar policor u plagos lehtë gjatë një sulmi në Zveçan më 8 dhjetor.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
