Përpjekjet e Moskës kundër sanksioneve dobësojnë kërcënimet perëndimore

Përpjekjet e Rusisë për të reduktuar varësinë e saj në sistemin financiar global e kanë gjetur atë më të përgatitur për të përballuar sanksionet “dëmtuese” që SHBA-të dhe Evropa kanë paralajmëruar nëse do të pasonte një sulm i ri në Ukrainë.

Sipas analistëve, suksesi relativ i asaj që investitorët e kanë quajtur “Fortesa e Rusisë” – strategjia e Moskës – ka të ngjarë t’i bëjë kërcënimet perëndimore më pak parandaluese.

Ndërkohë, BE-ja nuk e ka hequr veten nga gazi rus, duke bërë që çdo kufizim në eksportet ruse të energjisë të dëmtojë veten – ku i ka lënë mundësinë Moskës të hakmerret duke kufizuar furnizimet.

Sanksionet perëndimore në diskutim mund të shkojnë shumë përtej atyre të miratuara pas aneksimit nga Rusia të gadishullit ukrainas të Krimesë në vitin 2014.

Ato mund të marrin masa ndëshkuese të përdorura kundër Iranit dhe Koresë së Veriut që të gjitha, përveçse i shkëputin vendet nga ekonomia globale.

Por, Ministria e Financave e Rusisë, e cila ka testuar skenarët e rasteve më të këqija për vite dhe ka ngritur një njësi që punon për të kundërshtuar masat e mundshme nga Zyra e Thesarit të SHBA-ve për Kontrollin e Pasurive të Huaja, thotë se ekonomia e Rusisë mund t’u rezistojë edhe atyre llojeve të masave.

“Natyrisht, është e pakëndshme, por është e mundur. Mendoj se institucionet tona financiare mund ta trajtojnë atë nëse shfaqen këto rreziqe”, tha ministri rus i Financave, Anton Siluanov, javën e kaluar.

Mundësia e agresionit rus kundër Ukrainës dhe hakmarrjes financiare pasuese nga SHBA-të dhe Evropa është rritur pasi bisedimet në Gjenevë dhe Bruksel për të zbutur tensionet u konsideruan “të pasuksesshme” nga Kremlini javën e kaluar.

Presidenti rus, Vladimir Putin, ka vendosur më shumë se 100 mijë trupa përgjatë kufirit ukrainas dhe kërcënoi me veprime ushtarake nëse Perëndimi nuk përmbush një sërë kërkesash sigurie.

“Kur Putin pyet se çfarë të bëjmë nëse ndëshkohemi me sanksione për veprime ushtarake, zyrtarët e tij mund të përshëndesin dhe të thonë: ‘Po, Vladimir Vladimirovich, ne e dimë saktësisht se çfarë të bëjmë’, dhe kjo u jep atyre një ndjenjë besimi se sanksionet janë të pavlefshme dhe nuk ka asgjë për t’u shqetësuar”, tha Alexander Gabuev, bashkëpunëtor i lartë në Qendrën e Moskës “Carnegie”.

Që nga viti 2014, Rusia ka rritur rezervat e saj në valutë të huaj dhe ka kërkuar të fillojë “de-dollarizimin” e ekonomisë së saj.

Marrë nga “The Financial Times”, përshtatur për Albanian Post!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.