Përfundon raundi i tretë i bisedimeve Rusi-Ukrainë – Zhvillime të vogla pozitive

Ka përfunduar raundi i tretë i bisedimeve ndërmjet përfaqësuesve të Rusisë dhe Ukrainës.

Mykhailo Podoliak, një nga këshilltarët e kreut të Zyrës së Presidentit të Ukrainës, ka folur për rezultatet e bisedimeve.

Ai tha se, gjatë tyre, “ka zhvillime të vogla pozitive” në përmirësimin e logjistikës së korridoreve humanitare.

Podoliak gjithashtu shtoi se janë vazhduar konsultimet intensive për armëpushimin dhe garancitë e sigurisë.

Третій раунд переговорів закінчився. Є невеликі позитивні зрушення щодо покращення логістики гуманітарних коридорів… По базовому політичному блоку врегулювання разом із припиненням вогню та гарантіями безпеки інтенсивні консультації продовжені. pic.twitter.com/wR0BYPkcVH

— Михайло Подоляк (@Podolyak_M) March 7, 2022

Një përpjekje e mëparshme për të krijuar korridore humanitare të shtunën u rrëzua kur dështoi armëpushimi.

Gjatë natës së të dielës, një propozim i ri nga Rusia u cilësua “i papranueshëm” nga zëvendëskryeministrja e Ukrainës, Iryna Vereshchuk, pasi u bë e qartë se njerëzve që ikin nga Kievi do t’u ofrohet kalim i sigurt në aleatin e Rusisë, Bjellorusia, ndërsa ata në Kharkiv do të kenë një korridor që të çon vetëm në Rusi.

Nga katër qytetet e përmendura, vetëm ato më të voglat – Mariupol dhe Sumy – kanë rrugë evakuimi që të çojnë në pjesë të tjera të Ukrainës.

Një zëdhënës i Presidentit të Ukrainës e quajti atë “një situatë krejtësisht imorale”.

Më shumë se 1.7 milionë ukrainas janë larguar deri më tani nga vendi i shkatërruar nga lufta, ndërsa pushtimi vazhdon në ditën e tij të 12-të.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.