Përdoruesit e X do të duhet të paguajnë për aksesin në platformë, sipas Musk

Elon Musk ka sugjeruar që të gjithë përdoruesit e X mund të duhet të paguajnë për aksesin në platformë.

Në një bisedë me kryeministrin izraelit Benjamin Netanyahu, ai ka thënë se sistemi i pagesave është mënyra e vetme për të luftuar robotët.

“Ne po kalojmë drejt një pagese të vogël mujore për përdorimin e sistemit”, ka bërë me dije ai.

Ndërkaq, mbetet e paqartë nëse ky ishte vetëm një koment i hapur, apo një sinjal i planeve më të forta që ende nuk janë shpallur.

Prej kohësh, Musk ka thënë se zgjidhja e tij për të hequr qafe robotët dhe llogaritë e rreme në platformën e mediave sociale po kërkon verifikim.

Që nga marrja e Twitter-it vitin e kaluar, ai është përpjekur të stimulojë përdoruesit të paguajnë për një shërbim të përmirësuar, i cili tani quhet X Premium.

Kjo është bërë duke u dhënë abonentëve me pagesë më shumë veçori, si postime më të gjata dhe rritje të shikueshmërisë në platformë.

Sidoqoftë, përdoruesit aktualisht mund të përdorin ende X falas.

Megjithëse ka një interes të qartë financiar për kompaninë për të tarifuar përdoruesit, Musk këmbënguli që detyrimi për të paguar shërbimin ka për qëllim trajtimin e robotëve.

X Premium aktualisht kushton 8 dollarë në muaj në SHBA. Çmimi ndryshon në varësi të vendit ku ndodhet një pajtimtar.

Musk ka thënë se tani po shikonte opsione më të lira për përdoruesit.

“Ne në fakt do të dalim me një çmim të nivelit më të ulët. Pra, ne duam që ajo të jetë vetëm një sasi e vogël parash”, ka thënë ai.

“Ky është një diskutim më i gjatë, por sipas mendimit tim, kjo është në fakt mbrojtja e vetme kundër ushtrive të mëdha të robotëve”, ka shtuar Musk.

Megjithatë, një rrezik është që duke vendosur X pas një muri pagese, ai mund të humbasë një pjesë të madhe të përdoruesve.

Nga ana tjetër, kjo mund të ulë të ardhurat nga reklamat, të cilat aktualisht përbëjnë shumicën dërrmuese të të ardhurave të kompanisë.

Biseda e Musk me kryeministrin izraelit preku gjithashtu antisemitizmin në X.

Platforma është akuzuar nga grupi Anti-Defamation League (ADL) se nuk ka bërë mjaftueshëm për të ndaluar përmbajtjen antisemitike.

Në një deklaratë, organizata ka thënë se Musk po “angazhohej dhe po ngrinte” antisemitët.

Në fillim të këtij muaji, ai ka thënë se kompania do të padiste ADL-në për të “pastruar emrin e platformës”.

Në bisedën me Netanyahun, Musk përsëriti se ishte “kundër antisemitizmit”.

Netanyahu pranoi se ekuilibri midis fjalës së lirë dhe moderimit të përmbajtjes ishte një sfidë, por i kërkoi Musk-ut të mbante ekuilibrin e duhur.

“Shpresoj që të gjeni brenda kufijve të Amendamentit të Parë, aftësinë për të ndaluar jo vetëm antisemitizmin… por çdo urrejtje kolektive ndaj njerëzve që përfaqëson antisemitizmi”, ka thënë ai.

“Unë e di që jeni të përkushtuar ndaj kësaj”, ka shtuar Netanyahu.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.