Për deputeten e Lëvizjes Vetëvendosje, Fitore Pacolli, Kosova mu në krye me Albin Kurti, do t’ia dal të kalojë krizën energjetike më mirë se shumë shtete tjera.
E si referencë për këtë Pacolli, e jep deklaratën e Korporatës Energjetike të Kosovës, e cila ka lajmëruar se në ditët në vijim në Kosovë do të ketë më pak reduktime të energjisë elektrike, kjo fal rikthimit nga remonti i njësisë B2 të Termostatit Kosova B.
Megjithatë deputetja Pacolli, ka harruar që më shumë se dy javë Kosova po përballet me reduktime të energjisë elektrike me intervale të ndryshme kohore dhe ato në stinën e verës kur kërkesa për energji elektrike është shumë më e vogël në krahasim me stinën e dimrit.
Pacolli më tej për ta krahasuar situatën me shtetet e rajonit ka dhënë si shembull vendimin e Qeverisë së Maqedonisë së Veriut, e cila sipas saj ka shpallur gjendje krize për 30 ditë në sektorin e energjetikës.
Maqedoni të Veriut: Shpallet gjendje krize për 30 ditë në sektorin e energjetikës.
Kosovë: KEK raporton se ditëve në vijim do të ketë përmirësim të furnizimit me energji elektrike.
Po duket se do ta kalojmë krizën më mirë se shumë shtete tjera 💪. #QeveriaKurti
— Fitore Pacolli (@FitoreP) August 26, 2022
Masa e vetme që Qeveria e Kosovës ka ndërmarrë deri më tani ka qenë dërgimi i disa prej termocentraleve në remont, e që një masë e tillë sipas ekspertëve të energjisë elektrike ishte konsideruar si diçka e zakonshme, e cila në fund të ditës nuk mund të kontribuojë në parandalimin e krizës energjetike e cila natyrisht gjatë dimrit pritet ta rritë intensitetin e saj.
Ndryshe Kriza globale e ka prekur edhe Slloveninë, por qeveria atje, e udhëhequr nga një ekspert i energjisë elektrike, Robert Golob, ka marrë hapa konkret për t’ia zbutur krejtësisht qytetarëve rritjen e madhe të çmimeve.
Fillimisht, qeveria sllovene ka miratuar rregullimin e çmimeve të energjisë elektrike dhe gazit për familjet, klientët e biznesit të vogël dhe klientët e tjerë të mbrojtur.
Kjo masë do të hy në funksion nga 1 shtatori, derisa e njëjta pritet të bëhet në të ardhmen edhe për çmimet e ngrohjes qendrore dhe naftës për ngrohje.
Çfarë do shifrash që do të kap blerja e energjisë elektrike gjatë dimrit, qytetarët do të paguajnë të njëjtin çmim.
Por, sllovenët nuk e kanë lënë me kaq.
Kryetarja e Parlamentit të Sllovenisë, Urshka Klakoçar Zhupançiç, ka konfirmuar se tashmë është dorëzuar edhe propozim-ligji për uljen e tatimit mbi vlerën e shtuar (TVSH) për produktet energjetike.
Ajo siguroi se po shqyrtohet me procedurë urgjente, njofton televizioni N1.
Komisioni i Financave e ka mbështetur propozimin, po ashtu.
Projekt-ligji parasheh që normat e TVSH-së për furnizimin me energji elektrike, gaz natyror, dru zjarri dhe ngrohje qendrore të ulet nga 22 në 9.5 për qind për të gjithë përdoruesit.
Më vonë, i njëjti propozim është thënë se do të bëhet edhe për karburante.
Në të ardhmen paralajmërohet edhe rregullimi i çmimeve të ngrohjes qendrore dhe naftës për ngrohje.
Sekretari i Shtetit në Ministrinë e Financave , Tilen Bozhiç , ka thënë se vetëm me rregullimin e çmimeve masa e uljes së TVSH-së mund të jetë efektive dhe të reflektohet në çmime më të ulëta për përdoruesit fundorë.
Kjo pasi, nëse hiqet TVSH-ja, por nuk rregullohen çmimet, atëherë shitësit vetëm se përfitojnë për vete dhe prapë në të ardhmen ngritin çmimet.
Ministri ka thënë edhe se deri në fund të vitit do të dëshironte të fillonin një diskutim për ndryshime më të gjera dhe sistematike, jo vetëm të përkohshme, të taksave, duke përfshirë përshtatshmërinë e normave të TVSH-së për produkte individuale.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
