Osmani përkujton masakrën ndaj shqiptarëve në veri të Mitrovicës

Presidentja e Kosovës, Vjosa Osmani ka kujtuar ditën e tre dhe katër shkurtit të vitit 2000, kur u vranë 10 qytetarë të Mitrovicës, në mesin e të cilëve kishte pleq, gra dhe fëmijë.

Osmani përmes një shkrimi në rrjetin social ‘Facebook’, ka shkruar se kujtimi për ta vazhdon të rëndojë në ndërgjegjen e institucioneve.

“Kujtimi për ta do të rëndojë ende mbi ndërgjegjet tona, derisa autorët, pjesë të bandave kriminale të nxitura nga Serbia, të dalin para drejtësisë”, ka shkruar Osmani në Facebook.

Ndërsa, e para e shtetit kujtoi edhe numrin e të plagosurëve nga ajo natë dhe dëbimet që janë bërë.

“25 të plagosur nga ajo natë dhe 1664 familje të dëbuara me gati 12 mijë anëtarë nga ajo pjesë janë dëshmi e natës së trishtë, kur ata pësuan vetëm pse ishin shqiptarë por edhe dëshmi se spastrimi etnik ndaj shqiptarëve në veri të vendit vazhdoi edhe pas luftës”.

Teksa u shpreh se, “ngjarje të tilla mos u përsëritshin kurrë, teksa kujtimi për të vrarët qoftë i përhershëm!”.

Kanë kaluar 22 vjet që kur një grup i armatosur i serbëve kishin vrarë 10 qytetarë shqiptarë dhe kishin plagosur 25 të tjerë.

Pas natës së 4 shkurtit rreth një mijë e 600 familje me rreth 11 mijë e 500 banorë u shpërngulën nga pjesa veriore e Mitrovicë, pasi u dëbuan me dhunë nga shtëpitë e tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.