Norvegjia identifikon dy rastet e para të Omicron

Norvegjia ka identifikuar dy rastet e para të variantit të ri të coronavirusit Omicron, sipas ministrisë së Shëndetësisë.

Dy personat që u infektuan kishin qenë në një udhëtim në Afrikën e Jugut. Të dy ata aktualisht po shëroheshin nga infeksioni, tha në një deklaratë kryetari i bashkisë së Oeygarden, Tom Georg Indrevik.

Bashkia me afro 40 mijë banorë, kohët e fundit kishte parë një rritje të infeksioneve të varianteve të tjera të Covid-19.

“Tani do të shtrëngojmë më tej kufizimet lokale për të kontrolluar shpërthimin”, shtoi ai.

Organizata Botërore e Shëndetësisë (OBSH) ka paralajmëruar se varianti i ri i coronavirusit Omicron paraqet një rrezik të lartë të rritjes së infeksionit në të gjithë globin.

Varianti mund të çojë në pasoja të rënda në disa rajone, tha OBSH të hënën.

Kreu i organizatës, mjeku Tedros Adhanom Ghebreyesus, përsëriti thirrjen për një shtytje globale për të marrë vaksina për kombet më të varfra.

Varianti u zbulua në Afrikën e Jugut në fillim të muajit nëntor me provat fillestare që sugjerojnë se ka një rrezik më të lartë të ri-infektimit. Afrika e Jugut është vlerësuar për raportimin e saj të shpejtë të variantit.

“Omicron ka një numër të lartë mutacionesh, disa prej të cilave janë shqetësuese për ndikimin e tyre të mundshëm në trajektoren e pandemisë”, tha OBSH.

Rastet janë raportuar tashmë në një numër vendesh, përfshirë Kanadanë, Britaninë e Madhe, Portugalinë, Belgjikën dhe Holandën.

Varianti i ri ka nxitur Britaninë e Madhe, Bashkimin Evropian dhe SHBA-të të ndalojnë udhëtimet në vendet e Afrikës Jugore, një vendim i kritikuar nga Presidenti i Afrikës së Jugut, Cyril Ramaphosa.

Japonia ka njoftuar se po mbyll kufijtë e saj për vizitorët e rinj të huaj nga mesnata e së martës, ndërsa Australia ka ndalur planin e saj për të lehtësuar kufizimet kufitare.

Udhëtimi në Australi për studentët ndërkombëtarë dhe “punëtorët e kualifikuar” që mbajnë viza ishte menduar të rifillonte të mërkurën, por tani është shtyrë deri më 15 dhjetor.

Izraeli gjithashtu ka ndaluar hyrjen e të huajve në vend.

Në Mbretërinë e Bashkuar, programet përforcuese të COVID-it do t’u ofrohen të gjithëve mbi 18 vjeç për të ndihmuar në ndalimin e një valë të re të drejtuar nga Omicron.

SHBA ka ndjekur gjithashtu shembullin, ku presidenti Joe Biden u është drejtuar amerikanëve, duke u thënë që “shkoni të merrni përforcuesin tuaj”.

Ai gjithashtu u bëri thirrje njerëzve që të mbajnë maska në ambiente të mbyllura.

Biden tha edhe se ai nuk parashikonte ndonjë kufizim të mëtejshëm të udhëtimit ose bllokim në SHBA në këtë kohë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.