Ndalimi i marrëdhënieve seksuale jashtëmartesore nuk do t’i prekë turistët e Balit

Në Bali, vizitorët nuk do të rrezikohen nga Kodi Penal i sapo ratifikuar i Indonezisë.

Kështu ka bërë me dije guvernatori i ishullit.

Reagimi i tij ka hedhur poshtë shqetësimet se ligjet e rishikuara që përfshijnë nene që kriminalizojnë marrëdhëniet seksuale jashtëmartesore mund të trembin turistët.

E gjitha vjen pasi javën e kaluar, Parlamenti i Indonezisë miratoi projektligjin e diskutueshëm që gjithashtu ndalon bashkëjetesën mes çifteve të pamartuara.

Duke kërkuar të qetësojë vizitorët, guvernatori i Balit, Wayan Koster, ka vënë në dukje në një deklaratë të dielën se ligjet e reja, të cilat hyjnë në fuqi në tre vjet, mund të ndiqen penalisht vetëm nëse ka pasur një ankesë nga një prind, bashkëshorti ose fëmija.

Ata që “vizitojnë ose jetojnë në Bali nuk do të duhet të shqetësohen për hyrjen në fuqi të Kodit Penal Indonezian”, ka thënë ai.

Sipas guvernatorit, dispozitat në Kodin Penal për këtë çështje ishin ndryshuar nga një version i mëparshëm, më i rreptë, kështu që “do të sigurojnë një garanci më të mirë për privatësinë dhe komoditetin e të gjithëve”.

Qeveria e Balit do të sigurojë se “nuk do të ketë kontroll të statusit martesor gjatë regjistrimit në çdo akomodim turistik, të tilla si hotele, vila, apartamente, shtëpi pritjeje, shtëpiza dhe Spa”.

Po ashtu Wayan ka mohuar raportimet “mashtruese” të anulimeve të fluturimeve dhe rezervimeve të dhomave të hotelit.

Ai ka shtuar se të dhënat nga agjentët e udhëtimit, operatorët turistikë dhe akomodues, si dhe linjat ajrore, kanë treguar se numri i njerëzve që do të vizitojnë Balin nga dhjetori 2022 deri në mars 2023 është rritur.

Bali është qendra e turizmit në Indonezi dhe shoqata e turizmit po synon të ardhurit e huaj në ishullin kryesisht hindu për të arritur nivelet para pandemisë prej gjashtë milionë në vit deri në vitin 2025.

Ligjvënësit e kanë përshëndetur miratimin e Kodit Penal si një rishikim shumë i nevojshëm i një mbetjeje të sundimit kolonial holandez.

Zyrtarët kanë thënë se synon të ruajë “vlerat indoneziane” në kombin më të madh në botë me shumicë myslimane.

Por Maulana Yusran, zëvendësshefe e bordit të industrisë së turizmit të Indonezisë, ka thënë se kodi i ri ishte “krejt kundërproduktiv” në një kohë kur ekonomia dhe turizmi po fillonin të rikuperoheshin nga pandemia.

Edhe OKB-ja ka shprehur shqetësimin për kërcënimet ndaj lirive civile të paraqitura nga Kodi Penal, i cili përfshin ligje që bëjnë shkelje të fyerjes së presidentit, flamurit kombëtar dhe institucioneve shtetërore.

Marrë nga “The Guardian”, përshtatur për “Albanian Post”.

Indonezia miraton legjislacionin që ndalon marrëdhëniet seksuale jashtëmartesore

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.