Dakordësia e vendeve të Bashkimit Evropian për të hequr kufizimet e udhëtimit për Shqipërinë është padyshim “një lajm i mirë”, sipas ministres së Shëndetësisë dhe Mbrojtjes Sociale, Ogerta Manastirliu.
Përmes një postimi në median sociale Facebook, ajo ka përshëndetur vendimin e Bashkimit Evropian (BE), për heqjen e kufizimit në udhëtime për Shqipërinë.
“Një lajm i shumëpritur për të gjithë shqiptarët por edhe një shenjë e mirë se po shkojmë drejt normalitetit që të gjithë dëshirojmë”, shkroi ministrja.
Ndërsa ka bërë sërish thirrje për të gjithë qytetarët të respektojnë masat parandaluese anti-covid, në vendin tonë.
Sipas saj, duhet “të mos e ulim vigjilencën, në këto metra të fundit drejt daljes nga tuneli i gjatë i pandemisë”.
Të mërkurën e 16 qershorit, shtetet anëtare të Bashkimit Evropian (BE) u dakordësuan për të hequr kufizimet e udhëtimit për tetë shtete. Mes tyre gjenden edhe tre shtete nga Ballkani Perëndimor: Shqipëria, Serbia dhe Maqedonia e Veriut.
Këshilli i BE-së në maj hoqi zyrtarisht kufizimet për shtetasit e vendeve të treta, të cilat janë vaksinuar me dy dozat kundër COVID-19.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com