Lista Serbe: Kërcënimet e Sveçlës nuk do ta trembin Radoiçiç’in, as serbët në barrikada

Lista Serbe, përmes një komunikate për media, ka reaguar pas deklaratës së ministrit të Punëve të Brendshme, Xhelal Sveçla, se sa i përket të shpallurit në kërkim nga organet e rendit siç është Milan Radoiçiç,  “herët a vonë, ai do të ballafaqohet me drejtësinë”.

Kjo deklaratë “kërcënuese” e ministrit Sveçla, siç pretendojnë nga Lista Serbe, s’do ta frikësojë as Radoiçiç’in e as serbët lokalë në barrikadat e ngritura në pjesën veriore të Kosovës.

“Kërcënimet që Sveçla i dërgon zëvendëskryetarit Radoiçiç janë qesharake dhe nuk do ta trembin as Radoiçiç’in dhe as ndonjë serb në barrikada”.

Ndërkaq, Lista Serbe duke e përdorur aparatin propagandistik, vlerësoi se këto “kërcënime” ndaj liderëve të saj “paraqesin karakterin anti-serb të qeverisë së Albin Kurtit”.

“Kështu zbulojnë më së miri përdhunimet e tmerrshme dhe karakterin diktatorial të regjimit në Prishtinë”.

Gjithashtu, vizitat e shpeshta të ministrit Sveçla në zonën e banuar me shumicë serbe, parë përmes lenteve të korrierëve personal të presidentit serb, Aleksandër Vuçiç, “e kanë sjellë situatën në terren në një pikë të nxehtë”.

Propagandës së Listës Serbe i është bashkuar edhe drejtori i të ashtuquajturës “Zyrë për Kosovën” në Qeverinë e Serbisë, Petar Petkoviç, i cili përmes llogarisë së tij në Facebook, tha se “Sveçla i frikësohet Radoiçiç’it dhe harmonisë serbe”.

“Një gjë është e sigurt – Milan Radoiçiç do të jetë gjithmonë obsesioni i Sveçlës dhe i ekstremistëve të tjerë. Terrorin e Kurtit, populli serb s’do ta tolerojë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.