Itali/ Të paktën 10 të vdekur dhe dhjetëra të zhdukur në dy anije të mbytura në Mesdhe

Të paktën 10 persona kanë vdekur dhe dhjetëra rezultojnë të zhdukur, pas dy mbytjeve të veçanta të anijeve pranë brigjeve italiane, thanë ekipet e shpëtimit.

Dhjetë trupa u gjetën të hënën në kuvertën e poshtme të një varke druri në Mesdheun qendror nga shpëtuesit nga Nadir, një anije e operuar nga organizata bamirëse gjermane ResQship. Organizata bamirëse tha se shpëtoi 51 njerëz që ishin në bordin e anijes që po fundosej, e cila besohet se ishte nisur nga Tunizia.

Alarm Phone, një shërbim i linjës telefonike për njerëzit në vështirësi gjatë kalimit të Mesdheut, tha në X: “Ne u lajmëruam për një varkë në fatkeqësi, me rreth 60 persona. Jo autoritetet e BE-së, por Nadiri i vogël ofruan ndihmë. Fatkeqësisht, ata erdhën shumë vonë për 10 personat që vdiqën në kuvertën e poshtme. Kufijtë e BE-së vazhdojnë të vrasin!”.

Mbytja e anijes ndodhi rreth 40 milje në jug të ishullit italian të Lampedusas, raportoi Rai News i Italisë.

Më vete, 50 persona u raportuan të zhdukur pasditen e së hënës në një anije të mbytur në detin Jon, rreth 100 milje larg brigjeve të Kalabrisë në Italinë jugore. Dymbëdhjetë persona, përfshirë një grua shtatzënë, u shpëtuan nga një anije tregtare dhe u dërguan në portin Roccella Ionica. Ata kishin qenë duke udhëtuar me një varkë me vela që ishte nisur nga Turqia ditët e fundit, sipas raportimeve në shtypin italian. Në bord kishte njerëz me kombësi iraniane, irakiane dhe siriane.

Gjatë natës të së dielës, 173 persona mbërritën me tre varka në Lampedusa, duke përfshirë tre të mitur. Anijet ishin larguar nga Zawia në Libi dhe po transportonin njerëz nga Bangladeshi, Sudani, Siria dhe Egjipti.

Në fillim të këtij muaji, 11 trupa u gjetën nga deti në brigjet e Libisë.

Italia është një nga pikat kryesore të uljes për njerëzit që përpiqen të arrijnë Evropën, me rrugën qendrore të Mesdheut që konsiderohet si një nga më të rrezikshmet në botë. OKB-ja ka regjistruar më shumë se 20 mijë vdekje dhe zhdukje përgjatë rrugës që nga viti 2014.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.