Ora 20-mijë dollarëshe nga kryeministri i Katarit, Sveçla: Desha t’ia kthej, por u frikësova për lëndim të raporteve mes dy shteteve

Ministri i Punëve të Brendshme, Xhelal Sveçla, e ka pranuar se e ka marr një orë si dhuratë në vlerë prej 20-mijë dollarëve nga kryeministri i Katarit, të cilën kishte menduar t’ia ia kthej, por thotë se u frikësua se raportet mes dy shteteve mund të lëndoheshin.

“Në një hulumtim sipërfaqësor që unë kam bërë kam kuptuar që është diku rreth 20 mijë euro dhe menjëherë i kam shkruar eprorit tim kryeministrit të Kosovës, Albin Kurtit, me idenë që potencialisht edhe ta kthej”, tha Sveçla në KTV.

“Por, pas analizës dhe pas shqyrtimit të  këtij skenari doli që raportet mes Katarit dhe Kosovës mund të lëndoheshin dhe unë e kam njoftuar kryeministrin se dhuratën do ta marr, por jo për vete personalisht. Ora ndodhet në Ministrinë e Punëve të Brendshme dhe e kam deklaruar në doganë”.

“Pas rehatimit unë e hapa dhuratën dhe e pash që është një dhuratë e shtrenjtë që siç duket për këto vende nuk është e jashtëzakonshme, por për rrethanat e tona unë besoj që është jashtëzakonisht e shtrenjtë”.

Sveçla theksoi se i ka dorëzuar edhe ky një dhuratë kryeministri të Katarit.

“Pata nderin që ta takojë kryeministrin e Katarit në një takim bilateral dhe qysh më herët ne dorëzuam dhuratën tonë e cila një dhuratë simbolike – është harta e Kosovës e punuar në filigran”.

Kreu i MPB-së, ka potencuar se protestën e së hënës të organizuar nga veteranët e UÇK-së, e drejtuan PDK-ja dhe AAK-ja.

“Për që kanë qenë të cytur e besa të manipuluar nga PDK-ja e AAK-ja kjo s’ka kurrfarë dyshimi. PDK-ja e LDK-ja kanë votuar për ndryshimin e ligjit. Bekim Haxhiu, Shukri Buja, Fatmir Xhelili, Kadri Veseli, këta kanë votuar për ta bërë këtë shkëputje mes pagës minimale dhe pensionit të veteranëve para pesë vitesh, tash si mundet njëri nga këta të cytë protesta kundër një vendimi që këta e kanë marrë para pesë vjetësh”, ka shtuar Sveçla.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.