Hillary Clinton i bashkohet Universitetit të Columbia-s si profesoreshë e çështjeve globale

Ish-sekretarja Amerikane e Shtetit, Hillary Clinton, do t’i bashkohet Universitetit Columbia-s si profesoreshë e çështjeve globale në fakultetin për Marrëdhënie Ndërkombëtare dhe Publike (Sipa).

Lee Bollinger, presidenti i universitetit, njoftoi pozicionin e ri për Clinton-in, e cila ishte sekretare për Barack Obamën nga viti 2009 deri në 2013.

“Duke pasur parasysh talentet dhe kapacitetet e saj të jashtëzakonshme së bashku me përvojat e saj të veçanta jetësore, Hillary Clinton është unike dhe, më e rëndësishmja, e jashtëzakonshme në atë që mund të sjellë në misionet e Universitetit të kërkimit dhe mësimdhënies, së bashku me shërbimin publik dhe angazhimin për të mirën publike”, tha Bollinger në një deklaratë.

Clinton, e cila do të marrë postin e saj të ri më 1 shkurt, do të punojë së bashku me dekanin e Sipa-s, Keren Yarhi-Milo dhe anëtarë të tjerë të lartë të fakultetit në një “larmi nismash të mëdha”.

“Sekretarja Clinton do të na ndihmojë të përmbushim misionin tonë për të edukuar një brez të ri udhëheqësish parimorë dhe për të gjeneruar ide novatore të bazuara në kërkime”, tha Yarhi-Milo.

Sipas Yarhi-Milo, Clinton do të ndihmojë në udhëheqjen e një “përpjekjeje të re të madhe të Sipa-s për të mbledhur mendjet më të mira të politikave nga e gjithë bota për debat dhe bashkëpunim të fortë që synon zhvillimin e zgjidhjeve inovative të politikave”.

Clinton do t’i bashkohet Columbia World Projects, një iniciativë në mbarë universitetin që synon të lidhë aftësitë kërkimore të universitetit me nevoja të ndryshme globale.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.