Festojmë miqësinë!

“E nëse dashuria është e verbër, miqësia vetëdijshëm i mbyll sytë”, ka thënë Friedrich Nietzsche.

Një mik i vërtetë i sheh qartë gabimet tuaja, mbyll sytë dhe ju pranon ashtu siç jeni, ndryshe nga një i/e dashur që verbohet ndaj të metave tuaja për shkak të ndjenjave.

Miqësia është një tjetër përkufizim i dashurisë.

Madje, edhe kur shumica e të dashurve nuk mund ta përballojnë dot zemërimin tuaj në orën tre të mëngjesit, shoku/shoqja juaj, me siguri do t’ia dalë.

Ndaj sot, 30 korrik, kudo nëpër botë, festohet miqësia!

Ndonëse në Shqipëri nuk jemi ende të familjarizuar me këtë festë, simbolika e saj është universale në çdo kohë.

Dita Ndërkombëtare e Miqësisë u propozua për herë të parë, më 30 korrik 1958, nga Kryqëzata Botërore e Miqësisë, një Organizatë Civile Ndërkombëtare që bën fushata për të nxitur kulturën paqësore përmes miqësisë.

Ideja e festimit global të Ditës së Miqësisë erdhi nga Dr.Ramon Artemio Bracho, më 20 korrik 1958.

Ndërsa u ul për darkë me miqtë e tij në qytetin Puerto Pinasco, Paraguaj, grupi i gëzuar i miqve, i hapi rrugë Kryqëzatës së Miqësisë Botërore.

Ajo u mendua të ishte një themel që do të promovonte miqësinë dhe shoqërinë mes njerëzimit, pavarësisht nga gjinia, raca, përkatësia etnike ose feja.

Simbolika dhe rëndësia:

Sipas Kombeve të Bashkuara, Asambleja e Përgjithshme e OKB-së shpalli 30 Korrikun si Dita Ndërkombëtare e Miqësisë, me idenë se miqësia midis popujve, vendeve, kulturave dhe individëve mund të frymëzojë përpjekjet për paqe dhe të ndërtojë ura komunikimi midis komuniteteve.

“Rezoluta vendos theksin në përfshirjen e të rinjve, si udhëheqës të ardhshëm, në aktivitetet që përfshijnë kultura të ndryshme dhe promovojnë mirëkuptimin dhe respektin ndërkombëtar për diversitetin”.

Sidoqoftë, njerëzit në të gjithë globin kryesisht e presin ditën e miqësisë si simbolikë të miqësive të forta, me ata me të cilët mund të flasin për orë të pafundme, pa hezitim dhe që i ruajnë shpatullat njëri-tjetrit.

Edhe pse nuk është një festë që ofron pushime zyrtare, njerëzit në mbarë botën dalin me miqtë e tyre dhe ngrenë dolli për shëndetin e mirë të njëri-tjetrit dhe shumë vite të tjera së bashku.

Miqësia në të gjithë botën: Lidhja me faktorët kulturorë, shëndetin dhe mirëqenien

Sipas studimeve të kryera nga Departamenti i Këshillimit dhe Psikologjisë Klinike, Universiteti Columbia, New York në Shtetet e Bashkuara, u arrit në përfundimin që, sa më shumë njerëzit u japin përparësi miqësive, aq më të lumtur dhe të shëndetshëm janë ata.

Për më tepër, kontekstet më të gjera kulturore mund të kenë ndikime të mëdha në mënyrën sesi funksionojnë dhe shprehen miqësitë.

Prandaj, përfitimet që njerëzit marrin nga miqësitë, mund të ndryshojnë gjithashtu në kultura të ndryshme.

Roli i miqësisë në shëndet dhe lumturi

Studimi thotë se ekziston një lidhje e besueshme midis mbështetjes sociale, shëndetit mendor dhe fizik gjatë gjithë jetës dhe se një burim i rëndësishëm i mbështetjes janë miqtë tanë.

Miqtë na ofrojnë një ndjenjë të fortë shoqërie, zbusin ndjenjat e vetmisë dhe kontribuojnë në vetëvlerësimin dhe kënaqësinë tonë nga jeta.

Perceptimi i mbështetjes më të madhe nga miqtë shoqërohet me një ndjenjë më të madhe të qëllimit dhe kontrollit mbi jetën e dikujt.

Miqtë, gjithashtu, ndihmojnë individët të krijojnë sjellje të shëndetshme në jetën e tyre.

Sidoqoftë, miqësia nuk është universalisht e mirë për individët – depresioni dhe sjelljet negative të shëndetit mund të përhapen edhe përmes rrjeteve të miqve.

Si ndikoi pandemia në marrëdhëniet miqësore?

A e gjetët veten brenda një rrethi të ngushtë shoqëror?

Me sa persona jashtë familjes tuaj keni qenë në kontakt të rregullt, qoftë përmes rrjeteve sociale?

“Pandemia tkurri rrethet tona shoqërore”, shkruan autorja Kate Murphy për prestigjiozen “The New York Times”.

Ndërsa kultura jonë na ka inkurajuar të grumbullojmë shumë miq, pandemia ka bërë të qartë dallimin midis sasisë dhe cilësisë.

“Jeta jonë shoqërore dhe vetvetja sociale mund të mos jenë kurrë të njëjtat”, shkruan autorja.

Hulumtimi nga Robin Dunbar, psikolog evolucionist, tregon se qeniet njerëzore kanë aftësinë njohëse për të akomoduar vetëm katër deri në gjashtë miq të ngushtë.

Këta janë njerëzit në nivelin më të lartë të rrjetit tuaj social, të cilët kërkojnë ndërveprime të përditshme ose javore për t’u ruajtur.

Më të ulët në hierarki janë miqtë tek të cilët investoni në mënyrë progresive më pak nga vëmendja juaj. Për këtë arsye, lidhjet tuaja bëhen më të dobëta.

Pa ndonjë shkallë të kontaktit të rregullt, këta miq të nivelit të dytë dhe të tretë mund të bien në fushën e njohjes.

“Pandemia diferencoi miqësinë nga njohja, pasi shumë nga ata, të cilët nuk kishin patur kurrë biseda të thella dhe emotive me miqtë e tyre, u drejtuan drejt njerëzve të rinj. Kjo për t’u ndier të dëgjuar dhe të vlerësuar”, rezultoi nga hulumtimi i psikologut Dunbar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.