FBI-ja arreston 2 agjentë të dyshuar kinezë se kanë punuar brenda SHBA-ve kundër disidentëve

FBI-ja ka arrestuar dy agjentë të dyshuar kinezë.

Ndërkohë, prokurorët federalë kanë akuzuar dhjetëra të tjerë se kanë punuar për të heshtur dhe ngacmuar disidentët brenda Shteteve të Bashkuara të Amerikës.

Madje disa dyshohet se operojnë një “stacion policie të padeklaruar” në qytetin e New York-ut.

Dy persona të lidhur me një operacion të paligjshëm policor në Chinatown u arrestuan dhe pritet të dalin në gjykatën federale në New York, sipas John Marzulli, një zëdhënës i Prokurorit të SHBA-ve në Distriktin Lindor.

Të pandehurit dyshohet se drejtonin një “stacion policie të padeklaruar” në Manhatan. Është mbyllur që kur u ekzekutua një urdhër kërkimi në lokacion vjeshtën e kaluar, sipas zëdhënësit.

Sakaq, Departamenti i Drejtësisë ka njoftuar akuzat kundër 34 oficerëve të policisë kombëtare të Republikës Popullore të Kinës për ngacmim të shtetasve kinezë në SHBA, kritikë ndaj qeverisë kineze.

Të 34 të pandehurit besohet se jetojnë në Kinë dhe mbeten të lirë, sipas Departamentit të Drejtësisë. Oficerët ishin pjesë e një përpjekjeje të qeverisë kineze për të ndikuar në perceptimet globale të Republikës Popullore të Kinës.

Agjentët dyshohet se përdorën mediat sociale për të postuar në mënyrë të favorshme për Kinën dhe për të sulmuar “kundërshtarët e tyre të perceptuar”, duke përfshirë SHBA-të dhe aktivistët kinezë pro-demokracisë në mbarë botën.

Ata dyshohet se u drejtuan nga Ministria Kineze e Sigurisë Publike, për të krijuar dhe mbajtur llogari që dukeshin sikur drejtoheshin nga shtetas amerikanë.

Temat e makinës së tyre propagandistike përfshijnë politikën e jashtme të SHBA-ve, çështjet e të drejtave të njeriut në Hong Kong, pushtimin rus të Ukrainës, COVID-in dhe protestat e drejtësisë racore pas vrasjes së George Floyd.

Agjentët postuan gjithashtu video dhe artikuj që synonin avokatët kinezë pro-demokracisë në SHBA, pretendoi Departamenti i Drejtësisë, disa prej të cilave përfshinin kërcënime të qarta me vdekje.

Përveç kësaj, dyshohet se përdorën kërcënime për të frikësuar njerëzit që të anashkalonin protestat pro-demokracisë brenda SHBA-ve.

Marrë nga “CNN”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.