Elon Musk viziton Aushvicin pas zhurmës për mesazhet antisemitike në X

Elon Musk, i cili është kritikuar për lejimin e mesazheve antisemitike në platformën X, ka vizituar vendin e kampit nazist Aushvic-Birkenau.

Vizita e Musk në vendin më famëkeq të tmerreve të Holokaustit erdhi përpara një paraqitje të planifikuar më vonë në një konferencë mbi antisemitizmin e organizuar nga Shoqata Evropiane e Hebrenjve në qytetin e afërt polak të Krakovit.

Musk u fotografua duke vizituar sitin Birkenau, një fshat pranë Oswiecim, në Poloninë jugore, i rrethuar me tela me gjemba, ku kazermat prej druri për të burgosurit dhe rrënojat e një dhome gazi qëndrojnë si dëshmi të krimeve naziste, dhe ku qëndron një monument për viktimat.

Ceremonitë ndërkombëtare mbahen atje çdo vit.

“Para mbërritjes së Elon Musk në konferencën e Shoqatës Evropiane të Hebrenjve, ai mori pjesë në një vizitë private në Auschwitz-Birkenau me kryetarin e EJA, rabinin Menachem Margolin, Ben Shapiro dhe të mbijetuarin e Holokaustit, Gidon Lev. Musk vendosi një kurorë dhe mori pjesë në një ceremoni të shkurtër përkujtimore pranë memorialit Birkenau”, ka bërë me dije EJA.

Musk ishte vendosur të diskutonte antisemitizmin në internet me Shapiro në konferencën në Krakov, e cila u mbajt përpara Ditës Ndërkombëtare të Përkujtimit të Holokaustit më 27 janar.

Miliarderi është përballur me akuza nga Lidhja Anti-Shpifje, një organizatë e shquar hebreje për të drejtat civile, dhe të tjera për tolerimin e mesazheve antisemitike në platformën e njohur më parë si Twitter që nga blerja e saj në vitin 2022.

Çka shkaktoi një protestë në nëntor, duke përfshirë edhe Shtëpinë e Bardhë, kur ai iu përgjigj në X një përdoruesi që akuzoi hebrenjtë.

Ai shkroi: “Ke thënë të vërtetën aktuale”.

Por më vonë kërkoi falje për komentin, duke e quajtur atë postimin “më të trashë” që ka bërë ndonjëherë.

Disa marka të mëdha, duke përfshirë Disney dhe IBM, ndaluan reklamat në platformë vitin e kaluar pasi grupi liberal Media Matters zbuloi se reklamat e tyre po shfaqeshin së bashku me përmbajtje pro-naziste dhe postime nacionaliste.

Që atëherë X ka paditur Media Matters, duke thënë se organizata jofitimprurëse me bazë në Washington e ka prodhuar raportin për të “përzënë reklamuesit nga platforma dhe për të shkatërruar X Corp”.

Më shumë se 1.1 milion njerëz u vranë nga nazistët dhe pasardhësit e tyre në Aushvic gjatë Luftës së Dytë Botërore.

Shumica e atyre që u vranë ishin hebrenj, por viktimat përfshinin gjithashtu polakë, robër lufte sovjetike dhe të tjerë.

Në total, rreth 6 milionë hebrenj evropianë vdiqën gjatë Holokaustit.

Kur sovjetikët çliruan kampin, gjetën rreth 7 mijë të mbijetuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.