Dëshironi të përmirësoni qarkullimin? Përdorni këto ushqime

Qarkullimi i mirë i gjakut është shumë i rëndësishëm sepse mundëson transport më të mirë të oksigjenit dhe lëndëve ushqyese në indet e trupit tuaj, largon dioksidin e karbonit dhe mbeturinat nga indet, është i nevojshëm për të ruajtur jetën dhe për të përmirësuar shëndetin e të gjitha indeve të trupit.

Edhe pse është e nevojshme, ndonjëherë gjaku nuk rrjedh siç duhet nëpër trup, kjo mund të jetë për shkak të faktorëve të tillë si pirja e duhanit, presioni i lartë i gjakut, diabeti etj.

Megjithatë, ka mënyra për të përmirësuar qarkullimin e gjakut. Disa prej tyre përfshijnë shtrirjen, menaxhimin e stresit, ushtrimin dhe konsumimin e ushqimeve dhe pijeve të caktuara.

Këto ushqime mund të ndihmojnë:

Panxhari

E zakonshme në shumë pije “energjetike”, panxhari është i njohur për vetitë e tij energjetike, thotë dietologia Sidney Green.

Panxhari përmban nitrate natyrale, kimikate natyrale që gjenden në tokë, ajër dhe ujë dhe përdoren si një shtesë ushqimore për të ndaluar rritjen e baktereve dhe për të përmirësuar shijen dhe ngjyrën e ushqimit.

Këto nitrate ndihmojnë në përmirësimin e qarkullimit të gjakut kur shndërrohen në oksid nitrik në trup, i cili ndihmon në zgjerimin e enëve të gjakut.

Perime, barishte dhe erëza

Dietologia Amy Goodson sugjeron që ata që duan të përmirësojnë qarkullimin të përqendrohen në dietën “DASH”, sepse ajo është krijuar për të ulur presionin e gjakut dhe për të përmirësuar qarkullimin.

Ajo shpjegon se kjo dietë rekomandon të hahen katër deri në pesë racione me perime në ditë.

“Perimet janë të pasura me lëndë ushqyese dhe u mungon natriumi, i cili është një faktor i zakonshëm në presionin e lartë të gjakut dhe rrjedhimisht qarkullimin jo të shëndetshëm të gjakut”, shton Goodson.

Nëse keni nevojë të përmirësoni shijen, përdorni barishte dhe erëza në vend të kripës.

Arra

“Të pasura me acide yndyrore omega-3, arrat janë treguar se ndihmojnë në uljen e presionit të gjakut, gjë që mund të ndihmojë rrjedhjen e gjakut”, thotë Green.

Ajo thotë gjithashtu se arrat janë një burim i mirë i vitaminës E, e cila funksionon si një antioksidant dhe mund të ndihmojë në funksionin endotelial – duke çliruar substanca që kontrollojnë relaksimin dhe tkurrjen vaskulare, si dhe enzimat që kontrollojnë koagulimin e gjakut, funksionin imunitar dhe ngjitjen e trombociteve.

Fruta të pasura me kalium

“Një nga rekomandimet e dietës DASH është të hani ushqime të pasura me kalium”, thotë Goodson, “Frutat si hurmat, bananet, manaferrat dhe avokado përmbajnë sasi të mëdha kaliumi”.

Produkte të qumështit me pak yndyrë

Goodson thekson gjithashtu se sipas dietës “DASH”, kalciumi mund të ndihmojë në uljen e presionit të gjakut dhe përmirësimin e qarkullimit.

“Konsumimi i tre porcioneve të produkteve të qumështit me pak yndyrë në ditë mund t’ju ndihmojë të siguroni kalciumin që ju nevojitet”, thotë Goodson, duke shtuar se një porcion nënkupton një filxhan qumësht ose kos me pak yndyrë ose rreth 40 gram djathë me pak yndyrë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.