Çmimi Goldman nderon gruan indigjene që “ndaloi” gjigantin e minierave

Një udhëheqëse nga komuniteti indigjen Munduruku i Brazilit është vlerësuar për luftën e saj të suksesshme kundër minierave në pyjet tropikale të Amazonës.

Alessandra Korap Munduruku, 39 vjeç, është vlerësuar me çmimin Goldman të këtij viti, i cili njeh aktivizmin bazë, shkruan multimediali britanik “BBC”.

Fushata e saj vokale për të mbrojtur territorin Munduruku e pa atë të përballej me gjigantin e minierave Anglo American.

Si rezultat, Anglo American tërhoqi 27 aplikacione kërkimore për të minuar brenda territoreve indigjene.

Lëvizja e kompanisë përfaqëson një fitore të rrallë të një komuniteti indigjen ndaj një prej kompanive më të mëdha të minierave në botë.

E pyetur nga BBC nëse e konsideronte të frikshme perspektivën për të përballur gjigantin e minierave, Alessandra Munduruku tha se ajo kishte marrë forcë nga territori që synonte të mbronte.

“Ajo [Anglo American] mund të jetë e fuqishme për ju, por për mua, të fuqishmit janë lumi, forca e territorit tonë dhe popullit tonë, milingona që bën punën e saj dhe rezistenca e popullit tonë për më shumë se 500 vjet në luftën për tokën tonë”.

Ajo tha gjithashtu se mediat sociale kishin luajtur një rol kyç për t’i dhënë më shumë shikueshmëri luftës së saj, duke rritur kështu presionin ndaj Anglo American.

Me ndihmën e Koalicionit të Popujve Indigjenë të Brazilit (APIB) dhe grupeve të presionit Amazon Watch dhe Greenpeace, Alessandra hartoi një letër të hapur duke i bërë thirrje Anglo American të tërheqë lejet për të kryer kërkime minerare brenda territoreve indigjene në Amazonën braziliane.

Lejet ishin lëshuar pa pëlqimin e informuar të komuniteteve indigjene të nevojshme sipas kushtetutës së Brazilit.

Në fillim, kompania mohoi të kishte leje të tilla, por pas një fushate intensive mediatike të udhëhequr nga Alessandra, Anglo American tha se shqetësimet e ngritura prej saj e bindën atë të tërhiqte zyrtarisht më shumë se dy duzina aplikime kërkimore që i ishin dhënë tashmë.

Alessandra thotë se gjatë dekadës së fundit, gjithnjë e më shumë gra i janë bashkuar luftës për të mbrojtur territoret e tyre dhe tani po luajnë një rol kyç.

Megjithatë, ajo është e bindur se çelësi i fitoreve si ajo që arriti kundër Anglo American është ndërtuar mbi bashkimin e të gjithë komunitetit.

Letra e hapur që ajo i dërgoi kompanisë bazohej në një deklaratë zyrtare të hartuar në një asamble ku morën pjesë 45 shefa dhe 200 pjesëmarrës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.