Çka pritet të ndodhë sonte në “MTV Video Music Awards 2023”?

Ceremonia e ndarjes së çmimeve “MTV Video Music Awards 2023”, është afër nisjes, pasi e njëjta do të transmetohet drejtpërdrejt nga Qendra Prudential në Newark të martën e 12 shtatorit, duke filluar nga ora 20:00.

Shakira dhe Sean “Diddy” Combs pritet të marrin çmimet kryesore të nderit, më saktësisht: çmimin “Video Vanguard” dhe çmimin “Global Icon”.

Të dy artistët do të performojnë gjithashtu në shfaqje për herë të parë në më shumë se 15 vjet.

“MTV VMA” e sivjetme do të prezantojë një sërë performancash hip-hopi, pasi përveç Diddy-t, edhe Nicki Minaj do të marrë pjesë dhe do të performojë në shfaqje.

Cardi B dhe Megan Thee Stallion do të performojnë këngën e tyre të re, “Bongos”, e Lil Wayne dhe Metro Boomin janë gjithashtu në formacionin e performancës.

Po ashtu, Metro Boomin-it do t’i bashkohen Future, A Boogie Wit Da Hoodie, Swae Lee dhe NAV.

Dhe shfaqja do të ketë një përshëndetje për 50 vjetorin e hip-hop-it, duke ndjekur udhëheqjen e shumë shfaqjeve të tjera të çmimeve në vitin e kaluar.

LL Cool J, Grandmaster Flash, Furious Five, Darryl “DMC” Daniels dhe Doug E. Fresh janë ndër artistët që do të shfaqen në segmentin e mbylljes së shfaqjes.

Adhuruesit e hip-hop-it nuk janë e vetmja audiencë që shërbehet nga VMA-të e këtij viti – edhe ata të muzikës latine mund të presin me padurim performancat nga Anitta, Karol G dhe Peso Pluma – përveç Shakira-s, e cila, siç u përmend, është fituesja e çmimit “Video Vanguard” të këtij viti.

Fansat e popit mund të sintonizohen për artistet, Doja Cat, Olivia Rodrigo dhe Demi Lovato, derisa ata të rock-ut mund të presin me padurim Fall Out Boy dhe Maneskin.

Kelsea Balerini është pjesë e shfaqjes, për adhuruesit e muzikës country.

Tetë nga interpretuesit në shfaqjen kryesore të këtij viti janë nga jashtë SHBA-së, gjë që dramatizon se si skena muzikore është bërë më globale vitet e fundit.

Shakira dhe Karol G janë të dy nga Kolumbia; Stray Kids dhe TOMORROW X TOGETHER janë të dy nga Koreja e Jugut; Anitta është nga Brazili; Maneskin, nga Italia, Peso Pluma, nga Meksika dhe NAV, nga Kanadaja.

Ky është një kast shumë më ndërkombëtar se VMA-të inauguruese të vitit 1984, ku kishte pesë interpretues amerikanë (Madonna, Huey Lewis & the News, Tina Turner, ZZ Top dhe Ray Parker Jr.) dhe dy britanikë (Rod Stewart dhe David Bowie, kjo e fundit e përfaqësuar nga një performancë e regjistruar paraprakisht nga Londra).

Saweetie do të presë një shfaqje paraprake prej 90 minutash, me asistime nga Nessa, Dometi Pongo dhe Kevan Kenney.

Shakira do të bëhet artistja e parë e Amerikës së Jugut që do të marrë çmimin “Video Vanguard”.

Gratë e kanë dominuar tërësisht këtë kategori vitet e fundit. Shakira ndjek Rihannan (2016), P!nk (2017), Jennifer Lopez (2018), Missy Elliott (2019) dhe Nicki Minaj (2022). Burri i fundit që e fitoi çmimin në fjalë ishte, Kanye West në vitin 2015.

Diddy është marrësi i tretë i çmimit “Global Icon”, pas Foo Fighters (2021) dhe Red Hot Chili Peppers (2022).

Taylor Swift kryeson nominimet e “MTV VMA 2023” me 11 nominime, duke numëruar tre që ajo mori të premten e 1 shtatorit në kategoritë sociale.

Ajo ndiqet në numërimin e përgjithshëm të nominimeve nga SZA (tetë); BLACKPINK, Doja Cat, Miley Cyrus, Nicki Minaj, Olivia Rodrigo (gjashtë secila); Kim Petras dhe Sam Smith (pesë secili); dhe Beyonce, Diddy, Drake, Ice Spice, Karol G, Metro Boomin, Shakira dhe TOMORROW X TOGETHER (pesë secili).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.