Bazat e përbashkëta Filipine-SHBA nuk do të përdoren për luftime

Presidenti i Filipineve Ferdinand R. Marcos Jr. hodhi poshtë idenë se Shtetet e Bashkuara të Amerikës po përdorin bazat ushtarake të vendit të tij për qëllime luftarake.

Në një fjalim në Qendrën për Studime Strategjike dhe Ndërkombëtare (CSIS) në Washington, ai tha se koncepti origjinal i bashkëpunimit ishte ndryshimi i klimës dhe numri në rritje i fatkeqësive në Filipine.

“Kur këto gjëra të ndodhin, këto vende do të përdoren për të ofruar ndihmë më të shpejtë, shpëtim dhe rehabilitim dhe rindërtim të dëmeve që do të shkaktoheshin nga këto fatkeqësi”, shpjegoi Marcos, raporton Anadolia.

Marcos tha se i tha ministrit të jashtëm kinez disa javë më parë se këto baza nuk do të përdoren për të sulmuar asnjë vend.

Muajin e kaluar, disa organizata vendore dhe ndërkombëtare kundërshtuan bazat amerikane në provincën Cagayan të Filipineve, nga frika se marrëveshja e fundit e Manila-s për t’i siguruar Washington-it katër baza të tjera në rajon do të përkeqësonte një situatë tashmë të rëndë të të drejtave të njeriut dhe rrëmbimit të tokës.

Në prill, Manila siguroi katër baza të tjera ushtarake për përdorim të përbashkët me Washington-in, sipas Marrëveshjes së Bashkëpunimit të Rritur të Mbrojtjes (EDCA).

Dy nga katër objektet ushtarake shtesë janë të vendosura në provincën Cagayan përballë Tajvanit – Aeroporti Ndërkombëtar Cagayan North në Lal-lo dhe Baza Detare Camilo Osias në qytetin Santa Ana.

Më herët, ministri i Jashtëm Enrique Manalo tha se nuk do të lejonte që SHBA-të të grumbullonin armë në baza të përbashkëta ushtarake për t’u përdorur në operacionet në Tajvan.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.