Bankat bien në bursën e Milano-s pas shpalljes së një takse mbi “fitimet e tepërta”

Letrat me vlerë të bankave italiane ranë mëngjesin e së martës në bursën e Milano-s, pas vendimit të qeverisë së Giorgia Meloni-t për të vendosur një taksë prej 40 për qind mbi “fitimet e tyre suficit” të krijuara nga rritja e normave të interesit.

Lajmi u bë i ditur nga agjencia franceze “AFP”.

Të gjitha stoqet e bankave ranë.

Rreth orës 09:40 (07:40 GMT), Intesa Sanpaolo humbi 7,7 për qind, Unicredit 6,2 për qind, Monte dei Paschi di Siena (Mps) 7,3 për qind, Bper Banca 7,7 për qind, Banco Bpm 6,7 për qind dhe Mediobanca 2,9 për qind, në një treg të rënë me 1.64%.

Italia planifikon të vendosë një taksë mbi “fitimet e tepërta” të bankave prej “miliarda” euro për të kompensuar koston për familjet dhe bizneset nga rritja e normave të interesit, njoftoi të hënën në mbrëmje zëvendës kryeministri Matteo Salvini.

Taksa mbi fitimet e tepërta të bankave, e cila duhet të shlyhet deri në qershor 2024, do të përfshijë vitet kontabël të 2022 dhe 2023, mësoi AFP-ja nga një burim qeveritar.

Zbritja prej 40 për qind do të bëhet nëse të ardhurat neto nga interesi të regjistruara në vitin 2022 tejkalojnë vlerën e vitit financiar 2021 me të paktën 3 për qind.

Kjo taksë do të zbatohet për pjesën që tejkalon shumën e vitit financiar të mëparshëm.

Për fitimet e vitit 2023 krahasuar me vitin 2022, pragu nga i cili do të vendoset taksa shkon deri në 6 për qind.

Shuma e tatimit të jashtëzakonshëm në asnjë rrethanë nuk mund të kalojë një proporcion të barabartë me 25 për qind të vlerës së aktiveve neto të bankës.

Kryeministrja Giorgia Meloni synon kështu të mobilizojë fondet për projektbuxhetin për vitin 2024, i cili rrezikon të mbarojë burimet për shkak të rënies së papritur të prodhimit të brendshëm bruto prej 0.3 për qind të regjistruar në tremujorin e dytë.

Të ardhurat nga kjo taksë do të derdhen në një fond që synon financimin e masave që synojnë uljen e barrës tatimore për familjet dhe bizneset.

Bankat italiane, ashtu si konkurrentët e tyre evropianë, panë të ardhurat e tyre neto nga interesi të rriten në vazhdën e rritjes së normave të interesit, pa rritur shpërblimin e llogarive rrjedhëse të klientëve të tyre.

Banka e parë italiane Intesa Sanpaolo pati një rritje të fitimit neto me 80 për qind në 4.2 miliardë euro në gjysmën e parë, falë të ardhurave të krijuara nga rritja e normave të interesit.

Rivali i saj UniCredit postoi një fitim neto gjashtëmujor prej 4.4 miliardë eurosh.

Qeveria e krahut të majtë të Spanjës ka vendosur gjithashtu një taksë të jashtëzakonshme për bankat e planifikuar për 2023 dhe 2024, duke tërhequr kritika nga BQE-ja.

Rritja e normave të interesit: Italia takson “fitimet e tepërta” të bankave

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.