Bajqinovci nga Bërnjaku: “Sovraniteti i shtetit tonë është i pacenueshëm dhe ne punojmë pareshtur për ta ruajtur atë!”

Pika kufitare në mes të Kosovës dhe Serbisë, në Bërnjak, këtë të martë kishte mysafirë të veçantë.

Organet e sigurisë në këtë vendkalim kufitar u vizituan nga anëtarët e Komisionit Parlamentar për Siguri dhe Mbrojtje.

Si anëtar i këtij Komisioni, Mefail Bajqinovci ka shkruar një shkrim të shkurtër në llogarinë e tij në Facebook, duke treguar se vizita e tyre ishte e fokusuar në kushtet e punës dhe sigurisë, në këtë pikë kufitare të Kosovës.

“Unë edhe më herët i kam vizituar institucionet e sigurisë në këtë regjion, në cilësinë e deputetit”, ka shkruar Bajqinovci, por “sot këtë vizitë e realizuam si anëtarë të Komisionit parlamentar për Siguri dhe Mbrojtje të Kuvendit të Republikës së Kosovës”.

“Si komision u interesuam edhe për kushtet e punës, por edhe për situatën e sigurisë!”.

Bajqinovci ka shtuar se sovraniteti i Kosovës është i pacenueshëm dhe se Qeveria Kurti po e shtrinë atë në tërë territorin e shtetit.

“Sovraniteti i shtetit tonë është i pacenueshëm dhe ne punojmë pareshtur për ta ruajtur atë! Qeveria dhe institucionet tona të sigurisë janë duke e shtrirë sovranitetin cep më cep në tërë territorin e Republikës së Kosovës”, ka përfunduar ai.

Në këtë vizitë në Bërnjak, ishte edhe kryetari i Komisionit për Çështjet e Sigurisë dhe Mbrojtjes, Bekë Berisha.

Ky i fundit përveç njoftimit që ishte në këtë vizitë nuk ka dhënë asnjë detaj tjetër.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.