Apple, rekord të ri shitjesh

Gjatë tremujorit të fundit të vitit 2020, kompania teknologjike Apple ka arritur një rekord të ri shitjesh.

Sipas agjensisë së lajmeve BBC, blerja në masë e telefonave, laptopëve dhe pajisjeve të tjera teknologjike për fëmijët, ka bërë që shitjet e Apple-it në tremujorin e fundit të vitit 2020 të arrijnë më shumë se 111 bilionë dollarë, thuajse 21% më shumë se vitin e kaluar.

Kërkesa në rritje gjatë periudhës së pandemisë për pajisjet teknologjike, ka ndikuar te shitjet e shtuara të kompanisë e cila numëron 1.65 bilionë pajisje aktive në mbarë botën duke përfshirë më shumë se 1 bilionë iPhone.

BBC sqaron se Apple-i ia ka dedikuar rritjen e shitjeve daljes së telefonit më të ri iPhone 12 i cili ka bërë që shumë njerëz të azhurnojnë modelet e vjetra. Njëkohësisht, një faktor tjetër sipas kompanisë është edhe kërkesa e shtuar në Kinë për telefona të pajtueshëm me rrjetin 5G.

Në rajonin më të madh të Kinës që përfshin Hong Kong-un dhe Tajvanin, shitjet e Apple-it janë rritur me 57%, në Evropë 17% dhe në Amerikë me 11%.

“Produktet po shkojnë shumë mirë në fë gjithë botën. Jemi shumë optimistë teksa presim tremujorin e Marsit”, ka deklaruar  Luca Maestri, shefi i financës në kompaninë Apple.

BBC shkruan se analisti i Wedbush Securities, Dan Ives, e përcakton rekordin e shitjeve të Apple-it si fillimin e një “super cikli” i cili ndikohet nga përditësimi i pajisjeve prej adhuruesëve të kompanisë drejt versioneve më të reja që përkojnë me avancimin e ndërlidhjeve telekomunikative.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.