Aktivistët iranianë në Evropë janë objektiva të kërcënimeve

Irani dhe agjentët e tij duket se po orkestrojnë një fushatë në mbarë Evropën me ngacmime, mbikëqyrje, komplote të rrëmbimit dhe kërcënime me vdekje që synojnë aktivistët politikë që po protestojnë kundër regjimit.

Gazeta britanike”The Guardian” ka folur me 15 aktivistë iranianë të cilët janë shënjestruar në akte të ngjashme represioni në të gjithë Mbretërinë e Bashkuar, Francë, Gjermani, Spanjë, Zvicër dhe Suedi.

Në shumicën e rasteve, aktivistët janë paralajmëruar nga policia perëndimore ose agjencitë e sigurisë se Irani qëndron pas kërcënimeve të besueshme ndaj jetës së tyre si ndëshkim për aktivizmin e tyre në tokën evropiane.

Sulmet përfshijnë hakerim, sulme kibernetike dhe ngacmime në internet që mund të përfshijnë mijëra kërcënime me vdekje të dërguara gjatë një jave.

Dy aktivistëve në vende të ndryshme u janë çarë gomat e makinave vitin e fundit, gjë që ata dyshojnë se është bërë nga agjentë iranianë.

Disa raportojnë se janë ndjekur në shtëpi nga takimet nga burra të dyshimtë.

Një zëdhënës i qeverisë iraniane mohoi të gjitha akuzat për keqbërje.

Vdekja në paraburgim vitin e kaluar e Mahsa Amini-t, pas arrestimit të saj për shkelje të dyshuar të ligjit të detyrueshëm të hixhab-it.

Kjo e fundit, shkaktoi një valë të paprecedentë protestash masive në të gjithë Iranin që kërcënoi të rrëzonte Republikën Islamike.

Brenda Iranit, reagimi ndaj protestave ka qenë brutale, me më shumë se 500 njerëz të vrarë në rrugë gjatë marshimeve dhe rreth 20 mijë thuhet se janë arrestuar.

Më shumë se 100 protestues thuhet se janë dënuar me vdekje ose janë akuzuar për vepra penale, me shtatë ekzekutime deri më tani.

Irani ka kërkuar njëkohësisht të shtypë mospajtimin shumë jashtë kufijve të tij.

Mes atyre që janë në shënjestër janë Maryam Banihashemi, fytyra e lëvizjes së grave iraniane në Zvicër, ku ajo jeton që nga viti 2016, shkruan botimi britanik.

Sipas “The Guardian”, ajo është mësuar me kërcënimet për vdekje në mediat sociale pasi bëri thirrje publike për ndryshimin e regjimit në Iran.

Ajo beson se është ndjekur në shtëpi pas pjesëmarrjes në ngjarje politike, dy herë në Zyrih dhe përsëri pas një takimi me një deputet zviceran në parlamentin në Bernë.

Në qershor të këtij viti, Banihashemi u njoftua se mund t’i rrezikohej jeta.

Mesazhi, i dërguar asaj nga një person që ajo e di se punon për Gardën Revolucionare të Iranit, ishte rrëqethës: “Ata synojnë të të vrasin atje”.

Policia zvicerane që atëherë e ka këshilluar Banihashemi-n që të ndryshojë emrin dhe adresën e saj dhe të punësojë truproja private, të cilat ajo thotë se nuk mund ta përballojë.

Ajo tha: “Kur u transferova për herë të parë këtu, isha e lumtur. Pas vitesh represioni për të qenë një CEO femër në Iran, më në fund u ndjeva e lirë në Zvicër. Pas këtij viti, as Evropa nuk është e sigurt për mua”.

Një tjetër marrëse e një kërcënimi me vdekje ishte Farzane, një iraniane me bazë në Spanjë, e cila kërkoi të mos përdorej mbiemri i saj, raporton “The Guardian”.

Për gazetën britanikë, në shkurt, ajo mori një kërcënim përmes një llogarie në Telegram që pretendonte se fliste në emër të regjimit iranian.

Policia spanjolle nuk ka mundur të identifikojë dërguesin, i cili shkroi: “Do të të kërkojmë në Madrid dhe do të të vrasim. Ashtu si pjesa tjetër e miqve tuaj u arrestuan dhe u ekzekutuan në Iran, edhe ju do të ndëshkoheni”.

Farzane raportoi se ishte ndjekur në shtëpi nga takimet politike në Madrid nga dikush që ajo beson se është një agjent iranian.

Policia spanjolle inspektoi shtëpinë e saj dhe hapi një hetim, por ajo thotë se e mbyllën atë dy muaj më vonë.

Ajo vazhdon të organizojë protesta por jeton në një gjendje ankthi të vazhdueshëm.

Diku tjetër, agjencitë e sigurisë ose policia po japin disa këshilla ose një masë mbrojtjeje për ata që janë në shënjestër.

Marrë dhe përshtatur nga “The Guardian” për Albanian Post

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.