Shefi i Grupit Parlamentar të Aleancës për Ardhmërinë e Kosovës, Besnik Tahiri, në një konferencë për media të premten ka prezantuar draft-rezolutën që kjo parti do të prezantojë në Kuvendin e Kosovës e ku kërkohet dorëheqja e Qeverisë së Kosovës përmes një mocioni.
“Të gjitha parametrat e deri tanishme në tre vjetorin e kësaj qeverie kanë dëshmuar që janë plotësuar të gjitha kushtet që Qeveria të përmbyll mandatin e saj me dorëheqje duke votuar në Kuvendin e Kosovës mocionin për shkarkim”, është pika e parë e kësaj rezolute sipas Tahirit.
Pika e dytë e kësaj rezolute, ka theksuar Tahiri, sugjeron që Kuvendi i Kosovës të vetë-shpërbëhet dhe vendi të shkojë në zgjedhje.
Ndër të tjera Tahiri ka theksuar se mocioni i AAK-së duhet të votohet në atë mënyrë që të shpërbëhet Kuvendi i Kosovës.
“Lëvizja Vetëvendosje është e mirëseardhur dhe ata duhet ta votojnë mocionin e shkarkimit”.
Kryeministri i Kosovës, Albin Kurti, shprehu të enjten gatishmëri për të shkuar në zgjedhje të parakohshme parlamentare nëse dëshirojnë partitë opozitare në vend.
Në një intervistë për Radio Televizionin e Kosovës (RTK) të enjten, kreu i ekzekutivit kosovar garantoi se do t’ia sigurojë opozitës dy të tretat (2/3) e votave të nevojshme për shpërndarjen e Kuvendit të Kosovës dhe shkuarjen në zgjedhje të parakohshme parlamentare.
“Aktgjykimi i Gjykatës Kushtetuese nga viti 2020 tregon se duhen 2/3 e votave dhe s’ka mundësi tjetër që automatikisht të shkohet në zgjedhje; opozita mund të bëhet bashkë me neve – kjo është ofertë e imja. Ne i ndihmojmë opozitës nësë dëshirojnë zgjedhje, pa problem”, u shpreh ai.
Në anën tjetër Partia Demokratike e Kosovës dhe Lidhja Demokratike e Kosovës – dy partitë më të mëdha opozitare në Kuvendin e Kosovës – në mënyrë të menjëhershme kanë pranuar ofertën e kryeministrit të Kosovës, Albin Kurti, për të shkuar në zgjedhje të parakohshme.
Këtë ofertë të kryeministrit pa vënë në pikëpyetje as një minutë e ka pranuar fillimisht kryetari i PDK-së, Memli Krasniqi.
Përmes një postimi në platformën sociale, Facebook, Krasniqi ka potencuar se partia të cilën ai drejton nga korriku i vitit të kaluar ka bërë thirrje për shpërndarje të Kuvendit.
“Prej nesër nënshkrimet e PDK-së janë gati. Çohu shkojmë në zgjedhje menjëherë – nëse ke guxim e të ka mbet pak ndërgjegje për situatën e vështirë që e ke sjellë vendin!”, shkroi ai.
Në anën tjetër kryetari i LDK-së, Lumi Abdixhiku, në një intervistë për Televizonin T7, tha se LDK është e gatshme për zgjedhje që nga sonte, por që nuk e voton asnjë mocion të mosbesimit ndaj Qeverisë aktuale, meqë në vlerësimin e tij Kurti duhet të jap dorëheqje.
“Nëse Kurti është dorëzuar, e duket se është dorëzuar, le të jap dorëheqje. Por, le të ja shpjegoj popullit pse po i lë. LDK nuk bën mocion të shpërbërjes së Kuvendit, por është e gatshme për zgjedhje prej sot. Është e gatshme edhe për qeverisje pas zgjedhjeve”, potencoi Abdixhiku.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Maqedonci takon homologun hungarez, flasin për sulmin në Veri dhe sigurinë në Ballkan
-
Mehaj: Për 25 vite institucionet kanë bërë një punë modeste në argumentimin dhe ndriçimin e gjenocidit serb
-
Partitë shqiptare në Bujanoc nënshkruajnë marrëveshje paszgjedhore për të ruajtur shumicën
-
Ministri serb: Fitorja e Kosovës në KiE s’është më aq e lehtë dhe e thjeshtë
