Petkoviç: Kosova s’do zgjidhje për dinarin, ne duam që serbët t’i marrin paratë nga Banka Postare e Serbisë

Kryenegociatori i Serbisë, Petar Petkoviç, pas takimit me kryengociatorin e Kosovës, Besnik Bislimi dhe Emisarin Special të Bashkimit Evropian (BE) për dialogun Prishtinë-Beograd, Mirosllav Lajçak, ka akuzuar palën kosovare se nuk është e gatshme për të gjetur një zgjidhje për çështjen e dinarit.

“Kemi pasur bisedime të drejtpërdrejta me palën prishtinase, kemi paraqitur propozimin tonë. Propozimi ynë është i balancuar, merr parasysh interesat e popullit serb në Kosovë”, tha ai para gazetarëve.

“Nuk e di se në cilin drejtim do të shkojë dialogu. Unë jam i shqetësuar për pozitën dhe ardhmërinë e popullit serb në Kosovë dhe kur e shihni se nuk ka vullnet politik nga ana tjetër për të arritur një zgjidhje”, nënvizoi ai.

Megjithatë, Petkoviç theksoi se Serbia do të vazhdojë të negociojë për të ruajtur paqen dhe popullin serb në Kosovë të cilit sipas tij “po i shkelen të drejtat e njeriut”.

“Këto propozime i kemi diskutuar për më shumë se tre orë e gjysmë në bisedime të drejtpërdrejta me Prishtinën. Më pas ka pasur bisedime në nivel të takimeve dypalëshe me BE-në dhe marrëveshja është që të vazhdojmë bisedimet më 4 prill në Bruksel”, shtoi ai.

Ai potencoi se pala tjetër “nuk dëshiron kompromis” dhe se kryeministri i Kosovës, Albin Kurti do të vazhdojë “të persekutojë popullin serb”.

“Sidoqoftë, ne jemi të përkushtuar për dialog dhe do të bëjmë gjithçka për të arritur një zgjidhje me ekspertët tanë të mundohemi që të mundësojmë vazhdimin e punës së Bankës së Kursimeve Postare të Serbisë në Kosovë dhe që njerëzit tanë të mund të marrin pagat dhe pensionet nga Serbia. Ky është thelbi i propozimit tonë”, nënvizoi Petkoviç.

Në anën tjetër, kyenegociatori i Kosovës, Besnik Bislimi, pas takimit ka thënë se ka nevojë edhe për një takim tjetër javën që vjen.

“U pa që ka një dallim të madh të propozimeve të të dyja palëve dhe pas disa bisedimeve u dakorduam se ka nevojë edhe për një takim të radhës për të parë se a ka mundësi të afrohemi drejt një zgjidhje apo jo”, theksoi Bislimi.

Ndyshe, vendet perëndimore, posaçërisht Shtetet e Bashkuara të Amerikës, kanë kritikuar kryeministrin Albin Kurti se nuk është koordinuar me ta për çështjen e dinarit, madje kanë thënë se ky vendim ka cenuar raportet në mes të dy shteteve respektive.

Më 1 shkurt, hyri në fuqi rregullorja e re e BQK-sё, nëpërmjet së cilës synohet të ndalohet qarkullimi i dinarit serb nё territorin kosovar, duke specifikuar se valuta e vetme ligjore që lejohet për transaksione është euro.

Në zonat e banuara me shumicë serbe në Kosovë, përveç valutës euro, deri tani është përdorur edhe dinari nën sistemin paralel të financuar nga Serbia.

BQK-ja njoftoi se rregullorja e re do të zbatohet përmes një tranzicioni të lehtësuar, që do të zgjasë jo më shumë se tre muaj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.