Për herë të parë në historinë e Zvicrës, ligjvënësit e Gjenevës kanë prezantuar projekt-amendamentet në kushtetutën e kantonit që do të ndalonin shfaqjen ose mbajtjen e simboleve naziste në vende publike.
Kjo bëhet e ditur nga publikimi i agjencisë “AFP”.
Asambleja legjislative e Gjenevës debatoi propozimin për Ditën Ndërkombëtare të Përkujtimit të Holokaustit të premten dhe votoi me 56 vota pro dhe 28 kundër për t’ia referuar planin komisionit të të drejtave të njeriut për një shqyrtim më të plotë.
“Të gjithë thanë se janë dakord me tekstin, se ai është i dëshirueshëm, i nevojshëm dhe i dobishëm”, tha deputeti i të Gjelbërve, Francois Lefort në një koment për AFP.
Nëse ligjvënësit e Gjenevës miratojnë iniciativën, ajo duhet të miratohet ende nga parlamenti federal i Zvicrës në Bernë, e ndjekur nga një referendum kantonal.
Komiteti i çështjeve ligjore i parlamentit zviceran tha më parë se mbështeti ndalimin e simboleve naziste.
Në Zvicër, veshja dhe shfaqja publike e simboleve naziste nuk është e ndaluar, përderisa ato nuk shoqërohen me mesazhe që promovojnë ideologji raciste ose antisemitike.
Ky boshllëk në legjislacion përdoret në mënyrë aktive nga grupet neo-naziste dhe ata që fitojnë para duke shitur mallra me simbole të Rajhut të Tretë.
Ndërkohë, Zvicra, e cila qëndroi neutrale gjatë Luftës së Dytë Botërore, është nën presion në rritje për të rregulluar shfaqjen e simboleve naziste, siç kanë bërë shumica e vendeve evropiane.
Në këtë sfond, qeveria federale zvicerane vitin e kaluar udhëzoi Ministrinë e Drejtësisë të shqyrtonte mënyrat për të ndaluar simbolet naziste.
Në dhjetor, ata thanë se një ndalim i tillë “është i mundur në parim, por krijimi i një standardi të ri do të përballet me pengesa të konsiderueshme ligjore”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
