Vrasësit e dyshuar të Dom Phillips dhe Bruno Pereira do të përballen me trupën gjykuese

Një gjykatës federal në Brazil ka vendosur që vrasësit e dyshuar të Dom Phillips dhe Bruno Pereira do të përballen me trupën gjykuese.

Tre peshkatarë akuzohen për vrasjen e gazetarit britanik dhe ekspertit indigjen brazilian, të cilëve iu zu pritë pranë hyrjes së luginës së Javarit në Amazonën perëndimore në qershor 2022.

Amarildo da Costa de Oliveira, me nofkën Pelado; vëllai i tij Oseney da Costa de Oliveira, ose Dos Santos; dhe Jefferson da Silva Lima, i njohur si Pelado da Dinha, do të përballen me gjyqin për vrasje, ka vendosur gjykatësi, Wendelson Pereira Pessoa.

Sakaq, nuk është caktuar ende një datë për gjykimin.

Tre burrat u akuzuan në korrik 2022.

Prokurorët argumentojnë se Pereira ishte në shënjestër për të ndihmuar aktivistët indigjenë të mbronin tokat e tyre nga bandat e paligjshme të peshkimit dhe minierave.

Prokurorët kanë thënë se Phillips, një korrespondent i huaj për një kohë të gjatë dhe bashkëpunëtor i The Guardian, u vra “vetëm për shkak se ishte me Bruno, në mënyrë që të sigurohet mosndëshkimi për krimin e mëparshëm”.

Pessoa e përmendi këtë si një faktor rëndues në vendimin e tij. Ai përcaktoi se të dyshuarit – të cilët mbahen në burgje të sigurisë së lartë – duhet të qëndrojnë prapa hekurave deri në gjykim, duke gjykuar se ata përfaqësonin një rrezik dhe një kërcënim për sigurinë publike.

Ndërkohë, avokatët e të pandehurve thanë se do të apelonin kundër vendimit.

Disa të dyshuar të tjerë janë nën hetim për përfshirjen e tyre të dyshuar.

Në qershor, policia federale akuzoi Ruben Dario da Silva Villar si organizatori pas vrasjeve.

Silva Villar akuzohet për udhëheqjen e një rrjeti të paligjshëm të peshkimit transnacional që vepron në rajonin trekufitar midis Brazilit, Kolumbisë dhe Perusë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.