Vijojnë të rriten rastet, 3 humbje jete nga COVID-19 në Shqipëri

Gjatë 24 orëve të fundit janë regjistruar tre humbje jete nga coronavirus-i në Shqipëri, dhe kanë rezultuar pozitivë 895 persona.

Gjatë javëve të fundit vendi ynë ka parë një rritje të rasteve me COVID-19.

Në Spitalin Infektiv po marrin trajtim spitalor të specializuar 114 pacientë, ku 19 prej tyre janë në gjendje të rënduar.

Në 24 orët e fundit janë shëruar 519 pacientë, duke e çuar numrin e të shëruarve në 135 mijë e 321 që nga fillimi i epidemisë.

Që nga fillimi i pandemisë në Shqipëri, kanë humbur jetën 2 mijë e 505 qytetarë. Janë kryer mbi 1.6 milionë testime totale dhe 5 mijë e 901 testime ditore.

Aktualisht janë 11 mijë e 288 raste aktive me COVID-19 në të gjithë vendin.

Ministria e Shëndetësisë dhe Mbrojtjes Sociale u ka bёrё apel qytetarëve për t’u vaksinuar, me qendrat shëndetësore dhe pikat e vaksinimit që po ofrojnë shërbimin kudo në vend.

Apeli i MSHMS-së erdhi pas identifikimit të variantit Delta dhe në Shqipëri, i cili sipas ekspertëve është më ngjitës dhe më lehtë i transmetueshëm.

Fushata e vaksinimit

Që prej datës 1 gusht ka nisur fushata e vaksinimit masiv. Kjo do të zgjasë dhe për muajin shtator.

Kjo nismë i parapriu asaj tё datës 19-25 korrik, nё tё cilën u vendos një javë e hapur e vaksinimit masiv për çdo qytetar +18 vjeç.

E gjitha kjo ka ardhur në kuadër të fushatës “Shqipëria Buzëqesh”.

Deri më tani, Shqipëria ka vaksinuar mbi 1.4 milionë qytetarë.

Po ashtu, mbi 603 mijë të tjerë kanë kryer të dyja dozat e vaksinës anti-COVID.

Aktualisht, Shqipëria administron mbi 1.9 milionë vaksina. Vaksinat e përdorura janë: Pfizer, AstraZeneca, Sputnik V dhe Sinovac.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.