‘Vendosja e kamerave Huawei, vendim i rrezikshëm për Serbinë’

Prezantimi i planifikuar i 8 mijë e 100 kamerave Huawei në kryeqytetin e Serbisë, Beograd, por edhe në qytete të tjera, i kryer nga ministria e Brendshme, ka ngritur shqetësime te shumë ekspertë të të drejtave civile dhe sigurisë kibernetike.

Kjo teknologji është e ndaluar në Bashkimin Evropian dhe kritikët kanë frikë se qëllimi i saj i vërtetë është të synojë kundërshtarët e qeverisë, si në opozitë, por edhe aktivistët dhe gazetarët.

“Futja e planifikuar e teknologjisë biometrike të Huawei-t është një lëvizje politike që ka nevojë për monitorim”, thotë Milan Marinoviç, ish-komisioner i Serbisë për Informacionin e Rëndësisë Publike dhe Mbrojtjen e të Dhënave Personale, në një intervistë për mediumin “Balkan Insight”.

Puna e një komisioneri aktual tashmë do të jetë edhe më sfiduese, duke pasur parasysh planin e Qeverisë për të instaluar zyrtarisht mijëra kamera për njohjen e fytyrës të prodhuara nga gjiganti kinez i teknologjisë Huawei gjatë vitit 2022.

Marinoviç e ka të qartë se ekziston rreziku që ai të përdoret për përgjimin e politikanëve të opozitës apo gazetarëve hulumtues.

“Sigurisht që me futjen e një teknologjie te tillë, rreziku ekziston. Kjo është arsyeja pse ajo konsiderohet një metodë shumë invazive, sepse përmes rrjetëzimit mund të gjurmoni jo vetëm se kush dhe ku kanë qenë, por edhe zakonet, lëvizjet e tyre, kë kanë takuar”, thotë Komisioneri.

Huawei dhe Ministria e Brendshme e Serbisë kanë bërë një marrëveshje partneriteti edhe për sistemet e sigurisë publike “Smart City”, duke përfshirë një rrjet mbikëqyrjeje në shkallë të gjerë që do të instalohet në kryeqytetin e Serbisë dhe qytete të tjera.

Sipas projektit “Shoqëria e sigurt”, ministria ka instaluar më shumë se një mijë kamera biometrike.

Marinoviç thotë se rasti i kamerave Huawei ishte i pari që hasi kur mori detyrën në vitin 2019.

Që atëherë e deri më tani, Ministria e Brendshme ka dërguar në zyrën e tij dy raste studimore sesi përdorimi i kamerave do të ndikojë në mbrojtjen e të dhënave personale, dhe të dy u etiketuan si jo mjaftueshëm të mirë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.