Gjykata e Posaçme kundër Korrupsionit dhe Krimit të Organizuar, mëngjesin e 23 nëntorit, ka pushuar çështjen e gjyqtarit Ardian Dvorani, i cili është paditur penalisht për shpërdorim detyre nga presidenti i Republikës, Ilir Meta.
Kështu GJKKO-ja pranoi kërkesën e Prokurorisë së Posaçme (SPAK) për të pushuar kallëzimin për çështjen penale “Dvorani” të vitit 2020 – asokohe me funksion kryetar i Këshillit të Emërimeve në Drejtësi.
Fill pas mbarimit të seancës para mediave, gjyqtari Ardian Dvorani deklaroi se nuk ka përplasje me asnjë institucion dhe ka respektuar vendimin e marrë nga Gjykata.
“Unë s’kam përplasje me asnjë institucion, thjesht ushtroj detyrën. Të jesh gjyqtar është përtej realitetit të kem përplasje me institucione. Unë zbatoj vetëm ligjin, nuk kam përplasje me askënd”.
Sa i përket padisë së Presidentit, Dvorani para kamerave deklaroi se, “është e drejta e Metës që të ketë interpretimin e tij, nuk jam askush ta paragjykoj. Janë institucionet ato që vendosin. Koha e gjyqeve popullore i përket një epoke të kaluar. Çështjet nuk bëhen nëpër media, përtej gjithë respektit, por vendosen në gjykatë”, e përmbylli fjalën Dvorani.
Ndërsa, për këshilltarin ligjor të presidentit Meta, Bledar Dervishaj, vendimi i GJKKO-së është “i padrejtë”.
“Deri më tani, Presidenti i Republikës ka respektuar sekretin e Prokurorisë. GJKKO vendosi pushimin, por ne kërkuam mosakordim”, tha ai para gazetarëve.
Dervishaj bëri me dije se do ta ankimojë vendimin, duke ndjekur të gjitha hapat që ia lejon ligji.
“Do ta ankimojmë vendimin. Është pushuar vendimi për çështjen penale të vitit 2020, ku ishin shumë të pandehur”.
Ndërkohë pritet zbardhja e vendimit të GJKKO-së.
Çfarë ka ndodhur?
Të hënën e 22 nëntorit, SPAK kërkoi pushimin e çështjes për gjyqtarin Ardian Dvorani në lidhje me padinë që presidenti Meta bëri kundrejt tij në vitin 2020.
Aktualisht Dvorani mban postin e gjyqtarit pranë Gjykatës së Apelit Administrativ të Tiranës.
Më 18 shkurt të vitit 2020, Presidenti i Republikës depozitoi në SPAK padinë për Dvoranin.
“Të dashur qytetarë, pasi u njoha me provat e reja tronditëse të angazhimit të tij në grushtin e shtetit, sapo kam firmosur shtesën në kallëzimin penal ndaj Ardian Dvoranit”, do të shkruante Meta në atë periudhë në median sociale Facebook.
Përplasja e Presidentit Ilir Meta me Ardian Dvoranin erdhi pas ngërçit në Gjykatën Kushtetuese dhe dublimin e një vendi, për të cilin ishin emëruar dy anëtare, Marsida Xhaferrllari nga Meta dhe Arta Vorpsi nga KED.
Sipas Metës, Dvorani, kishte shkelur ligjin duke kryer dy vepra penale, “shpërdorim detyre” dhe “përvetësim të titullit apo detyrës”.
Meta kërkoi nga SPAK-u sekuestrimin e audiove të mbledhjeve të KED-it. Kjo, për të parë procedurën e ndjekur me dërgimin e listave të kandidatëve për Gjykatën Kushtetuese në Kuvend dhe Presidencë.
Nga ana tjetër, ish-kreu i KED u shpreh se ai nuk e kishte shkelur ligjin. Meta kallëzoi në Prokurori Drovanin dhe publikoi disa video kundër tij, ku shpjegonte atë që ai e quan “grushtin e shtetit”.
Dvorani u largua nga detyra si kryetar i KED-it nga Këshilli i Lartë Gjyqësor, pasi i kishte mbaruar mandati, por vazhdonte të qëndronte, me pretendimin se nuk ishte gjetur zëvendësuesi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
