Tregu i Krishtlindjeve në Pragë u hap për herë të parë pas pandemisë

Mijëra njerëz u dyndën në Sheshin e Qytetit të Vjetër të Pragës gjatë fundjavës për të ndezur një pemë të Krishtlindjes 25 metra dhe për të rihapur tregun vjetor pas një mbylljeje dyvjeçare për shkak të COVID-19.

Lajmi u bë i ditur nga agjencia “Reuters”.

Megjithatë, këtë vit për shkak të krizës energjetike, në treg ka pasur më pak drita se zakonisht.

I popullarizuar si nga çekët ashtu edhe nga turistët e huaj për verën e nxehtë, salsiçet, ëmbëlsirat dhe dhuratat, tregu ka instaluar më shumë llamba të kursimit të energjisë për të kursyer para dhe për të dërguar një sinjal sezonal të efikasitetit të energjisë.

“Ne vendosëm të reduktojmë numrin e dekorimeve me ndriçim në rrugë dhe të përdorim dritat më moderne LED, kjo vlen edhe për pemën e Krishtlindjes”, tha anëtari i Këshillit Bashkiak të Pragës Jan Čabr.

Qyteti vendosi të mos i ndezë garlandët për gjithë ditën, si vitin e kaluar, por vetëm nga ora 16:00 deri në mesnatë.

“Ne nuk duam t’i privojmë njerëzit nga atmosfera festive e Krishtlindjeve dhe Vitit të Ri… por ne e kuptojmë që energjia nuk duhet të harxhohet kot”, shtoi Čabr.

Kujtojmë, në Portugali, për shkak të krizës energjetike, dritat e Krishtlindjeve do të fiken gjatë natës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.