Tre ushtarë rusë u vranë herët të hënën nga rrëzimi i rrënojave të një droni ukrainas që u rrëzua teksa po sulmonte një bazë në rajonin e Saratov-it të Rusisë, njoftuan agjencitë ruse të lajmeve, duke cituar ministrinë e mbrojtjes.
Ky ishte sulmi i dytë në bazë këtë muaj, shkruan “Reuters”.
“Një mjet ukrainas pa pilot u rrëzua në lartësi të ulët teksa po i afrohej aeroportit ushtarak Engels në rajonin e Saratov-it”, njoftuan agjencitë e lajmeve nga ministria ruse. “Si pasojë e rënies së rrënojave të dronit, tre ushtarakë rusë të stafit teknik që ndodheshin në aeroport u plagosën për vdekje”.
Baza, pranë qytetit të Saratov-it, rreth 730 kilometra në juglindje të Moskës dhe qindra kilometra nga linjat e frontit në Ukrainë, u godit më 5 dhjetor në atë që Rusia tha se ishin sulme me dronë ukrainas në dy baza ajrore ruse.
Sulmet e dyfishta i dhanë Rusisë një goditje të madhe reputacioni dhe ngritën pikëpyetje se pse dështoi mbrojtja e saj, thanë analistët, ndërsa vëmendja u kthye në përdorimin e dronëve në luftën mes fqinjëve.
Ukraina nuk ka marrë asnjëherë publikisht përgjegjësinë për sulmet në Rusi, por ka thënë megjithatë se incidente të tilla janë “karma” për pushtimin e Rusisë.
Ministria ruse e mbrojtjes tha se pajisjet e aviacionit nuk u dëmtuan, por sipas raportimeve jozyrtare të mediave sociale ruse dhe ukrainase, një numër avionësh u shkatërruan.
Më herët të hënën, Roman Busargin, guvernatori i rajonit të Saratov-it, tha se objektet e infrastrukturës civile nuk u dëmtuan në incident.
“Nuk ka absolutisht asnjë kërcënim për banorët… Objektet e infrastrukturës civile nuk u dëmtuan”, tha Busargin.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Kristi Noem, zëvendësja e mundshme e Trump: Kam vrarë qenin tim, e urreva, ishte i padisiplinuar
-
Maqedonci takon homologun hungarez, flasin për sulmin në Veri dhe sigurinë në Ballkan
-
Nga Suedia në Mbretërinë e Bashkuar, një valë arrestimesh zbulon praninë e një rrjeti spiunësh kinezë në Evropë
-
Sadaf Baghbani: Kam 150 fishekë në trup, mendova se askush nuk do të më dojë më